El PP nun va participar nel procesu de reforma del estatutu

El presidente del PP asturianu Ovidio Sánchez dio anuncia ayeri de que'l so grupu parlamentariu nun va participar na ponencia encargada de la reforma del Estatutu d'Autonomía, afitando la postura del PP nesta cuestión a lo llargo de los últimos meses.

El presidente de los populares asturianos aseguró que'l determín del PP de nun tomar parte nel procesu de reforma estatutaria "nun tien torna" anque poniéndo-y a la so negativa una posible fecha de vencimientu, la de la presente llexislatura. Con ello'l PP torga que puea facese reforma nenguna de la llei orgánica de l'autonomía asturiana, en cuantes que pa que la reforma salga alantre ye preciso que la voten les trés quintes partes dela Xunta Xeneral.

Los populares asturianos xustifiquen la so negativa aentrar a la reforma porque esta namás sedría pa ellos qu'un intentu de "esmucir otros debates" como'l del fracasu del referéndum sobre l'Estatutu catalán y la "reforma constitucional tapecida" que supón l'estatutu catalán. El fechu de que la reforma asturiana, según va'l calandariu, tuviera que rematase yá coles elecciones yá pa entamar ye otru argumentu pol que'l PP defende la so postura en cuantes que'l tener un compromisu electoral mui allegáu al debate, ello podría facer que delles reclamaciones garraren "tintes reivindicativos".

De cualquier manera, pal dirixente popular sí sedría posible entamar la reforma pa la llexislatura qu'entra, la 2007-2011. Nesi finxu de tiempu Ovidio Sánchez albidra que la reforma "ensin ser un asuntu de preferencia" podríen pesllala les dos fuerces mayoritaries, PSOE y PP, ensin "grandes discrepancies".