El PP modifica un videu promocional de Mariano Rajoy qu’incluyía un mapa imperialista gallegu

El miércoles pasáu, la páxina web de Mariano Rajoy asoleyó un videu promocional del candidatu a les eleiciones xenerales pol PP nel que salía un mapa imperialista gallegu. Los populares nun tardaron en modificalu y incorporar un mapa oficial.

 

Asina, poco más d’un día duró’l mapa qu’incluyía como Galicia la parte occidental del nuesu país, amás de territorios d’El Bierzu y Zamora. Nel videu apaecíen semeyes sobre la trayeutoria vital del políticu pontevedrés sobreimpresionaes sobre un mapa de ‘Galiza’ qu'ampliaba les fronteres del país vecín a parte del territoriu qu'oficialmente pertenez a Castilla y Lleón y a Asturies. Ésti incluyía la bandera gallega cola estrella colorada, vinculada col nacionalismu gallegu, amás de rotulación en gallegu reintegracionista.

 

La formación Nós-Unidade Popular fixóse ecu d’esti detalle y, tres la emisión del videu, emitió un comunicáu nel que, de forma irónica “agradecía al PP l'espardimientu del mapa nacional” de Galicia. Pronto, el PP camudó’l videu na parte que salía esti polémicu mapa por otru verde nel que se ven les cuatro provincies gallegues.