El PP márcase contra la regasificadora de Xixon

La diputada nacional del PP Alicia Castro Masaveu denunció ayeri que'l de la regasificadora de Xixón podía ser un casu de corrupción al alxudicáse-y "a deu" la so construcción a Enagas. La diputada del PP echó tamién contra los efectos mediuambientales de la política enerxética n'Asturies

La diputada Castro Masaveu dixo claramente que "si'l futuru d'Asturies pasa per tresformar el paraísu natural nun "campu de producción enerxéticu" ensin debate nin tresparencia, "va haber que que sospechar y suponer" que tres del proyectu lo que se pretende ye facer d'Asturies un basureru en cuantes que la construcción de la ergasificadora nun respuende a les necesidaes de consumu de corriente asturianes, al producir la comunidá autónoma muncho más de lo que precisa, tando amás Asturies cubierta en cuestión de suministru de gas cola construcción del gasoductu Bizkaia - Asturies que llegó a aprobar l'anterior executivu del PP.

Pa Castro Masaveu la regasificadora ye "un regalu envelenáu" del presidente Zapatero que va tener efectos negativos n'Asturies no medioambiental, llamando l'atención sobre'l calentamientu del agua del mar que va producir la planta na redolada del Musel ". Pa castro Masaveu, la regasificadora va suponer tamién un impactu social al nun ser necesaria nin dir a crear grandes cantidaes de puestos de trabayu, anque va tener daños mediuambientales y daños a la democracia al nun debatise la so instalación en parlamentu. Siguiendo argumentos asemeyaos a los qu'empleguen colectivos ecoloxistes y grupos vecinales, Castro Masaveu esplicó que la construcción de la llinia d'alta tensión de Lada - Velilla nun tien más oxetivu que "xustificar la regasificadora" y acusó al presidente asturianu Álvarez Areces de "mentir" cuando diz qu'Asturies va tener problemes económicos graves si nun se fai esta llinia.

El fechu de que la regasificadora de Xixón vaya llevala alantre la empresa catalana ENAGAS en cuenta d'empreses de titularidá pública o de capital local tamién mereció la condena de l'antigua conceyala del Ayuntamientu d'Uviéu. Pa Castro Masaveu, mientres na regasificadora de Mugardos (Ferrol) y la de Bizkaia participen empreses de capital gallegu y vascu respectivamente, n'asturiana solo se cuanta cola participación de la catalana Enagas, lo que supón facer d'Asturies una "colonia catalana" ello cuando llegó a anunciase que la regasificadora de Xixón diba facela una empresa participada por capital públicu, lo que llevó a Castro Masaveu a falar de "posible corrupción".