El PP ganaría les eleiciones estatales y Ciudadanos pasaría a ser la segunda fuercia, según el barómetru del CIS

El Centru d’Investigaciones Sociolóxiques (CIS) dio a conocer esti martes l’avance de datos del barómetru d’abril. El PSOE quedaría como tercer fuercia tres ser superáu por Ciudadanos, mentes que’l PP ganaría otra vuelta les eleiciones estales pese a la perda continua d'intención de votu que vien rexistrando dende'l 2017.

La formación liderada por Mariano Rajoy tendría una intención de votu del 24 por cientu, lo que supodría un 2,3 por cientu menos que na encuesta última, de xineriu. Esti periodu coincide cola polémica protagonizada pola presidenta de la Comunidad de Madrid, Cristina Cifuentes, que la llevó a dimitir.

Ciudadanos pasaría a ser el principal partíu de la oposición, con un 22,4 por cientu, superando al PSOE, que tendría un 22 por cientu. Xuníos Podemos y les sos confluencies algamaríen un 19,6 por cientu d’apoyu.

Resultaos del 2016

Esta encuesta vien a confirmar el gran retrocesu del PP n’intención de votos si lo comparamos col so resultáu eleutoral nes eleiciones de xunu del 2016. Naquella cita los populares sumaron el 33,01 por cientu del total de votos, lo que significa una diferencia de nueve puntos.

El segundu partíu más votáu foi’l PSOE, con un 22,63 por cientu, quedando en tercer llugar Xuníos Podemos-En Comú-En Marea con un 17,6 por cientu. Ciudadanos, mentes, rexistró un 13,06 por cientu del total.