El PP español propón recortes n'Ayuda al Desarrollu

El PP presentó un paquete de 504 enmiendes a los Presupuestos Xenerales del Estáu pal 2011 nes que propón un recorte de 750 millones d'euros, de los que 200 saldríen del Fondu d'Ayuda Oficial al Desarrollu.

Los otros 50 saldríen de les sovenciones nominatives del Ministeriu de Ciencia y Innovación. L’oxetivu ye poder derogar la conxelación de les pensiones el próximu añu y permitir un aumentu de les prestaciones del ún por cientu.
  
El coordinador económicu del PP, Cristóbal Montoro, esplicó en rueda prensa que la enmienda propón un recorte de 200 millones na estaya 31 del proyectu de llei, dedicada a los gastos "diversos" y que constitúi la ferramienta principal de negociación del Gobiernu colos grupos parlamentarios mientres la tramitación de les cuentes públiques. Esta partida reduciríase asina hasta los 80 millones d'euros.
  
A estes cantidaes súmase un recorte de doce millones d'euros nes aportaciones a los partíos políticos --7,2 millones en gastos de xestión y otros 4,8 millones en gastos corrientes-- y a los sindicatos y otros axentes sociales, que sufriríen un recorte de cinco millones d'euros distribuyíos de manera proporcional".
  
Per otru llau, el PP inclúi nes sos enmiendes les midíes que vino defendiendo contra la crisis, al traviés d'una reforma de la Llei d'Estabilidá Presupuestaria p'afitar techos de gastu a comunidaes autónomes y entes llocales, rebaxes selectives d'impuestos a les pymes o incentivos fiscales a la I+D+i, ente otres midíes.
  
Yá hai 918 millones recortaos
El Proyectu de Presupuestos Xenerales del Estáu yá contempla un recorte de 918 millones d'euros na Ayuda Oficial al Desarrollu sobre'l 2010, cantidá qu'inclúi los 300 millones d'euros recortaos nel exerciciu en cursu frutu de les midíes d'austeridá presupuestaria aprobaes pol Gobiernu.
  
Esta reducción viose elevada porque'l próximu añu va dexar de computase como AOD una parte del presupuestu del Ministeriu d'Industria, Turismu y Comerciu que la Organización pa la Cooperación y el Desarrollu Económicu (OCDE) permitía contabilizar como tala, y que nel 2010 subió a 234 millones d'euros, polo que'l Gobiernu asegura que'l "recorte real" de l'ayuda al desarrollu nel 2011 va ser de 484 millones d'euros.
  
En total, l'Executivu prevé que l'ayuda al desarrollu pal conxuntu de l'Alministración Xeneral del Estáu algame los 3.667 millones d'euros, de los que 1.130 millones d'euros van ser pal presupuestu de l'Aecid, incluyíos 100 millones d'euros pal Fondu de Microcréditos y otros 150 millones pal Fondu de l'Agua que pretende estender l'accesu a l'agua potable n'América Llatina y el Caribe.
  
Nun hai 0’7
El pasáu 7 d'ochobre, cuando la secretaria d'Estáu de Cooperación, Soraya Rodríguez, presentó estes cuentes nel Congresu, el voceru parlamentariu del Grupu Popular na materia, Gonzalo Carbayos, alvirtió que l'oxetivu de destinar el 0,7 por cientu del PIB a Desarrollu nel 2015 nun podría cumplise, y sorrayó que, tres un recorte "sin precedentes", l'ayuda oficial va asitiase nel 2011 a niveles del 2007, con un 0,37 por cientu del PIB destináu a estos oxetivos.