El PP d’Avilés abandona’l Plenu al considerar “sexista” una espresión del conceyal de Cultura

“Manes blanques nun ofenden” foi la frase que consideró “sexista” la popular Carmen Rodríguez Maniega. El conceyal de Cultura y Deporte, Román Antonio Álvarez González, nun quinxo retirar les sos pallabres.
 
Ello llevo Rodríguez Maniega y a tolos conceyales del PP d’Avilés a marchar del Plenu, onde taba debatiéndose sobre la Fundación Municipal de Cultura, por sentise ofendíos. La edil criticó’l “despilfarru” d’esta área y Álvarez González retrucó-y señalando que ‘manes blanques nun ofenden’, una espresión que la popular considera “sexista” porque, na so opinión, vien a dicir que los comentarios d’una muyer nun tienen la mesma importancia que la d’un home.
 
Mentes, Álvarez González señaló que la espresión cola que se refirió a la popular “úsase pa dicir qu’ún nun s’ofende polo que-y dixeren”.