El PP asturianu propón a Ovidio Sánchez como candidatu a la Presidencia d’Asturies

El comité electoral del PP d'Asturies propunxo ayeri a Ovidio Sánchez como candidatu a la presidencia d'Asturies nes elecciones que van celebrase en mayu del 2007. La propuesta pa qu'Ovidio Sánchez repita como candidatu nel 2007 vieno dempués d'un discutiniu enforma gafu nel PP asturianu y nel que se sintieron los nomes del alcalde d'Uviéu Gabino de Lorenzo y del ex - ministru Francisco Álvarez Cascos como candidatos, anque a la fin namás el diputáu Juan Morales llegó a entamar una candidatura alternativa a Sánchez por facese col primer puestu na llista electoral del PP, atropando más de 7.000 firmes ente militantes y simpatizantes populares. Lo encerriscao de la situación llevó a la dirección del PP asturianu a dexar en manes de Madrid la escoyeta de la persona encargada de defender les sos sigles n'Asturies, pero la dirección estatal del PP refugó facese cargu d'ello, encamentándo-yos a a los populares asturianos que designaren candidatu.

El senador popular y conceyal uvieín Jaime Reinares, que foi l'encargáu de dar anuncia de la candidatura d'Ovidio Sánchez, declaró que'l so intentu de que Madrid escoyere al candidatu nun se debía más qu'a la so interpretación de los reglamentos del partíu y enfotóse nes posibilidaes d'Ovidio Sánchez pa ganar les elecciones, desdiciéndose asina d'anteriores declaraciones en que cuestionare la capacidá del yá candidatu nel 1999 y 2003 pa llegar a la presidencia. Agora entama nel sen del PP el procesu pa iguar el restu de la llista autonómica, pa lo que'l comité electoral va volver a aconceyar esti 16 de xunu.