El PP asturianu nun-y ve xacíu a entamar agora la reforma estatutaria

El secretariu Xeneral del Partíu Popular d'Asturies, Reinerio Álvarez, declaró que-y chocaba que se fale de reforma del estatutu cuando entovía tan por pesllar bien de tresferencies pendientes nun procesu que ta resultando, al paecer del dirixente popular, más abegosu de lo que se contaba.

El retrasu de la tresferencia en Xusticia, que tenía de tar asumida pola comunidá autónoma asturiana dende primeros d'añu ye la principal esmolecimientu del dirixente popular, que denuncia tamién qu'hai retrasos en tresferencies que cinquen a agües intracomunitaries, comunicaciones, ferrocarriles de vía estrencha o demarcación de puertos, una tresferencia qu'afecta a 17 puertos. Reinerio Álvarez llamentó que la negociación d'estes tresferencies, amás de dir despacio, nun va apurrir resultaos tolo positivos p'Asturies que debiere.

Esti asitiamientu del PP sobre tresferencies y reforma del estatutu vien dempués de que'l Presidente Asturianu Vicente Álvarez Areces diere anuncia de que pal mes de mayu ta previsto que llegue a la Xunta Xeneral del Principáu la comunicación del executivu sobre la reforma del Estatutu d'Autonomía, ello dempués de que'l conseyu consultivu remita'l 25 d'abril el so dictame definitivu sobre la reforma del Estatutu. En llegando al parlamentu esta comunicación, la xunta Xeneral va proceder a nomar una comisión encargada de la reforma del Estatutu, colo que va emprimar el procesu políticu pal remocique de la Llei orgánica de la comunidá asturiana.