El PP apoya un gobiernu de "centru-derecha" n'Asturies

El vicesecretariu d'Organización y Electoral del PP, Carlos Floriano, aseguró esti llunes que'l so partíu apoya que n'Asturies "puea haber un gobiernu de centru derecha" pero alvirtió que l'oxetivu de déficit hai que cumplilu, gobierne'l que gobierne" y "apóyese o nun s'apoye" per parte del PP asturianu al candidatu de Foru, Francisco Álvarez-Cascos.
Asina lo declaró Floriano nuna rueda prensa na sede nacional, tres la xunta de María Dolores de Cospedal colos vicesecretarios xenerales del partíu, a preguntes sobre si'l PP asturianu va apoyar a Cascos, si tán faciendo un "doble xuegu" n'Asturies y si l'apoyu del so partíu ta condicionáu al informe de l'Abogacía y de la Intervención Xeneral del Estáu sobre la situación financiera d'esta comunidá.
"Nun hai un doble xuegu del PP n'Asturies. Queremos qu'haya un gobiernu de centru derecha y el que tien que decidilo ye un diputáu d'UpyD, que tien de dicir a quién apoya", sorrayó'l dirixente 'popular', calcando en que l'apoyu de la so formación a Foru ye "irrelevante" si nun se tien l'apoyu del partíu de Rosa Díez.
Al preguntes preguntáu si van apoyar a Cascos, repitió qu'hai que sumar los 23 escaños que dan la mayoría absoluta nel Parlamentu. "Apoyaráse al que determine'l PP d'Asturies, pero vamos sumar primero 23 y depués vamos ver qué se fai", añadió, pa destacar que'l so partíu va actuar pensando nel interés xeneral de los ciudadanos, que ye l'empléu y el crecimientu económicu.
De la mesma, calcó en qu'Asturies tien que cumplir coles perspectives de déficit, un compromisu que ye "de toos".  "Esto nun ye xuegu. A una situación seria hai que responder con seriedá y el compromisu col déficit ye algo no que tienen que tar implicaes toles alministraciones y xugar a otra cosa ye lo contrario de lo qu'hai que facer", sorrayó.
Nesti sen, el responsable d'Organización del PP insistió en que l'apoyu del PP d'Asturies a la formación d'un gobiernu de centru derecha "nun ta condicionáu a nada" pero l'oxetivu de déficit "hai que cumplilu" en toles alministraciones públiques, "gobierne'l que gobierne".