El Polisariu: "tenemos armes, homes y voluntá pa llevar la guerra a Rabat"

El representante del Frente Polisariu n'España, Bucharaya Beyun, alvirtió esti vienres que si nun s'avanza na solución del conflictu, la organización va vese "obligada" a acudir a la guerra.

Nesti sen, anque almitió que los sah.arianos "nunca" van tener capacidá pa vencer militarmente a Marruecos, precisó que tienen "armes, homes y voluntá" abondo, y que la guerra "nun quedaría namás nel territoriu sah.arianu, algamaría Rabat y Casablanca".
  
Coles mesmes, tanto Beyun como los activistes de la organización Sáh.ara Thawra Javier Sopeña y Silvia García aseguraron que'l Gobiernu español nun se punxo en contactu con ellos pa pidi-yos "información" sobre lo asocedío la selmana pasada en L’Ayún mientres l'asaltu al campamentu de protesta sah.arianu y los posteriores disturbios.
  
Mientres una rueda prensa celebrada en Madrid, Beyun alvirtió que si nun s'avanza nuna solución diplomática acorde coles resoluciones de la ONU y l'autodeterminación, el Frente Polisariu va utilizar "tolos instrumentos xurídicos llegales pa defender la so llibertá, incluyida la guerra".
  
"La mesma población va obligar al Polisariu a tomar les armes", añadió. "Van obligamos a eso, anque nun seya del nuesu gustu", aseguró. "Nun esperamos qu'España se ponga del nuesu llau en casu de guerra, pero polo menos queremos que la opinión pública apoye que tenemos derechu a acudir a les armes", prosiguió.
  
"El nuesu oxetivu nun ye vencer militarmente a Marruecos, nun podemos, nunca vamos poder vencelos", precisó. "Nun tenemos les armes que tien l'Exércitu de Marruecos, pero tenemos armes, tenemos homes y tenemos voluntá abondo", mientres que la población marroquina "simplemente nun ta preparada pa esa guerra". En tou casu, alvirtió, "esa guerra nun diba quedar namás nel territoriu sah.arianu, algamaría Rabat y Casablanca, si ye necesario".

Contactos col Gobienu
Na mesma rueda de prensa, Sopeña --que tornó'l pasáu domingu a España xunto con García procedente de la capital del Sáh.ara Occidental-- informó que naide se punxo "en contactu" con ellos pa pidi-yos "nengún tipu d'información" y aseguró que si'l Gobiernu de José Luis Rodríguez Zapatero lo pide, ta dispuestu a facilita-y "la mesma información" que publicaron otros medios.
  
Pela so parte, el representante del Polisariu esclaró que nun tien previsto na so axenda nengún alcuentru nin col PSOE nin col Executivu, y precisó que "nestos díes el Gobiernu en nengún momentu contactó col Polisariu pa pidi-y información o la so opinión".
  
Coles mesmes, ante la insistencia de la ministra d'Asuntos Esteriores y de Cooperación, Trinidad Jiménez, d'esperar a qu'haya una investigación independiente sobre los fechos de L’Ayún pa que'l Gobiernu puea pronunciase sobre los mesmos, Beyun defendió que Marruecos torga qu'haya "nenguna información independiente".
  
Según él, "naide ta en condiciones de dar esa información" porque "tolos que lo tienen tán deteníos, y les families tán zarraes nes sos cases, nun puen falar porque la ciudá ta tomada polos militares". L'asaltu marroquín, prosiguió, "cometióse en silenciu, a escures, porque Marruecos nun quiso testigos".
  
Aparte, prosiguió, la misión de la ONU (Minurso) "nun pudo facer nada porque Marruecos nun dexó investigar", y hasta "torgó dir a los hospitales". Amás, Francia vetó, mientres el recién debate nel Conseyu de Seguridá de Naciones Uníes, l'envíu d'una comisión internacional. "¿Quién pue facer informes independientes? Naide", señaló.
  
Per otra parte, Beyun calificó de "tratu vexatoriu" que Rabat namás permita la entrada "a cuentagotes" de medios españoles a L’Ayún. "Nun tengo nenguna duda de la sinceridá y el bon facer de los medios españoles, de 'El Mundo' y 'El País'", pero pa poder llevar a cabu'l so trabayu correctamente, alvirtió, "Marruecos tendría que permiti-yos que fueren a les cases sah.arianes, que fueren solos".

Acusaciones de terrorismu
Bucharaya Beyun criticó duramente les acusaciones del Gobiernu de Marruecos, sobre manera del ministru del Interior, Taieb Cherqaoui, qu'aseguró que los axentes qu'asaltaron el campamentu alcontráronse con métodos de violencia asemeyaos a los existentes na zona sur del Sah.el, onde opera Al Qaeda nel Magreb Islámicu (AQMI).
  
Según el representante del Polisariu, Marruecos controlaba tolos accesos al campamentu y "sabía quién taben dientro". Aparte, mientres les negociaciones con los organizadores de la protesta "participó'l ministru del Interior en persona, tuvo negociando con ellos dos díes antes", pese a lo que los acusó darréu de pertenecer a "una banda armada".
  
Al respecto, Beyun recordó que'l coordinador de la llucha antiterrorista del Departamentu d'Estáu d'Estaos Uníos, Daniel Benjamin, declaró que nun hai nenguna prueba sobre les supuestes conexones terroristes de los activistes sah.arianos y qu'AQMI nun llograría "nenguna ventaya" d'actuar en Sáh.ara Occidental. "El caldu de cultivu pal terrorismu en Marruecos ta en Casablanca, pola miseria, la probitú, non nel Sáh.ara", señaló'l representante sah.arianu.
  
Según Beyun, l'oxetivu del asaltu, y el fechu de que s'escoyere'l 8 de payares, día del entamu de les conversaciones informales de Nueva York, aseguró Beyun, yera forzar a los sah.arianos a "nun asistir a les negociaciones y acusar al Polisariu de la rotura del diálogu". "A lo último, fuimos pa evitar asumir les consecuencies de la rotura".
  
Mientres eses primeres hores del asaltu, denunció, munches persones intentaron percorrer a cuerpu o n'automóvil los quince kilómetros que los alloñaben de L’Ayún. "A eses persones masacráronles o desapaecieron", aseguró. "Si los desapaecíos tán muertos o deteníos, nun lo sabemos, Marruecos nun informa", denunció.