El poemariu 'Cantar de ti mesma', disponible pa emocionar a los llectores

Pablo Texón presenta n'Uviéu'l llibru col que ganó'l XXVII Premiu Xuan María Acebal de poesía, correspondiente al añu 2021.

Ediciones Trabe distribuyó nes selmanes últimes peles llibreríes del país la obra 'Cantar de ti mesma'. Esta tarde l'autor de Felechosa va presentala nun actu que va tener llugar a les 19 hores na Biblioteca d'Asturies Ramón Pérez de Ayala.

Esti poemariu de Texón naz d'un acontecimientu triste pal escritor como ye la perda de la so madre y, “anque ye un cantar de muerte, una elexía, tamién ta escritu na celebración de la felicidá, de l’allegría de vivir", espresó l'escritor na gala d'entrega de los Premios Lliterarios, onde amosó'l so deséu de poder emocionar a los llectores. Nel actu d'Uviéu de güei, que va presentar Laura Marcos y va contar con una intervención virtual d'Alejandro Fernández-Osorio, ganador del Xuan María Acebal del 2020 con 'Tayu', va tar acompañáu por Ricardo Saavedra, doctor en Teoría Lliteraria, músicu y escritor.