El PNV ganaría les elecciones vasques siguíu de Bildu

|

El PNV llograría ente 23 y 24 escaños en casu de celebrase nesti momentu elecciones autonómiques n'Euskadi, ente qu'EHBildu tornaría na segunda fuerza nel Parlamentu vascu, con 22 parlamentarios, siguíu del PSE-EE, que llograría 17, y el PP, que tendría ente 12 y 13 representantes, según l'Euskobarómetru.
 

 En total, realizáronse 1.200 entrevistes nes sos cases a mayores de 18 años, 400 en cada territoriu históricu de la Comunidá Autónoma Vasca, ente'l 8 y el 24 de mayu del 2012.
 
   Según los resultaos de la encuesta, el PNV volvería ser el ganador electoral nunes hipotétiques elecciones al Parlamentu vascu celebraes nesi momentu. Con un 32 por cientu de los votos válidos y un retrocesu moderáu, podría llograr ente 23 y 24 escaños. En Bizkaia llograría la primer posición, con 10 escaños (sobre un  38% de los votos válidos), en Gipuzkoa la segunda posición con siete escaños (con sobre'l 25% de los votos válidos) y 6 o 7 representantes n'Álava (con sobre'l 23% de los votos válidos).
 
   La coalición EHB, con un 25 por cientu de los votos válidos, podría llograr 22 escaños: 10 en Gipuzkoa, onde sería la primer fuerza (con sobre un 37% de los votos válidos), seis en Bizkaia, onde ocuparía la segunda posición (con sobre'l 22% de los votos válidos), y 6 escaños n'Álava (con sobre'l 20% de los votos válidos).
 
   El PSE-EE, nun ciclu de "claru retrocesu", perdería la segunda posición actual. Con un 20 por cientu de los votos válidos y 17 escaños, perdería cualquier posibilidá de formar gobiernu otra vuelta. El meyor resultáu llograríalu n'Álava y Bizkaia, con un 20 por cientu de los votos válidos y seis escaños, respectivamente, mientres en Gipuzkoa quedaría con 5 escaños y un 18 por cientu de los votos válidos, quedando en tercer posición en tolos territorios.
 
   El PP meyoraría lixeramente los sos resultaos, anque recularía a la cuarta posición con 12 ó 13 escaños y un 14 por cientu de los votos válidos. El meyor resultáu llograríalu n'Álava, onde podría recuperar la primer posición con 6 ó 7 escaños (sobre un 26% de los votos válidos), ente qu'en Gipuzkoa (con un 11% de los votos válidos) llograría 3 escaños y en Bizkaia (con un 14% de los votos válidos) llograría otros 3 escaños.
 
   Ezker Batua, con un 2 por cientu del votu válidu y una distribución bien homoxénea en tolos territorios, tendría "bien difícil" la entrada nel Parlamentu vascu, mientres qu'UPyD, con sobre otru 2 por cientu de los votos válidos, quedaría a les puertes del Parlamentu vascu y Ezker Anitza-IU, con otru 2 por cientu del votu válidu, tampoco llograría representación.

Contador Estadistiques