El Plenu del Conseyu Asesor de la Llingua Asturiana aconceyó p’afitar los diferentes grupos de trabayu

Esti llunes aconceyó per segunda vegada’l Plenu del Conseyu Asesor de la Llingua Asturiana, onde se presentó’l llabor entamáu pola Comisión Permanente estos meses. Iniciativa pol Asturianu treslladó a los participantes la necesidá d'abrir "cuanto primero sía posible" la reforma del Estatutu pa oficializar l'asturianu y el gallego-asturiano.

La conseyera de Cultura, Política Llingüística y Turismu, Berta Piñán, presidió’l Plenu, que se celebró, al igual que’l primeru de constitución, de manera telemática. Nel mesmu espúsose’l trabayu de la Comisión Permanente, que preside’l vicepresidente de Conseyu y direutor xeneral de Política Llingüística Antón García, que ye l’órganu que trabaya ente los plenos, cola obligación de celebrase nun tiempu máximu de 6 meses dende l’últimu.

Ésti ta compuestu pola secretaria Irene Arece y cinco miembros escoyíos por Piñán: Xosé Ramón Iglesias Cueva (Academia de la Llingua Asturiana), Belén Rico, Víctor Suárez, Iris Díaz Trancho (‘Reciella. Families pol Asturianu’) y María Xosé Rodríguez López (Oficina de Normalización Llingüística de Xixón). En febreru aconceyó per primer vegada y dende entós vien trabayando na configuración de los diferentes grupos de trabayu que se propunxeron ayeri, ente otres cuestiones.

Tamién se tocaron dellos temes, como’l proyeutu del Gobiernu pa potenciar la rede de normalización llingüística, y hebo intervenciones de coleutivos participantes. Por exemplu, Iniciativa pol Asturianu llamentó’l desconocimientu esistente al respeuto de los planes del Executivu sobre la reforma del Estatutu pa declarar oficiales al asturianu y al gallego-asturiano.

“Nin nós nin los representantes políticos colos que tenemos contactu tenemos negún tipu d'información”, apuntó’l so presidente, Iván Llera. “Nun hai que perder más tiempu. La modificación de la norma cimera de la comunidá autónoma supón tamién la so aprobación nel Congresu de los Diputaos, nun procesu que pue allargase años”, recordó nun comunicáu la institución, qu’encamentó al Executivu a facelo “cuanto primero sía posible”.

Por eso entaína a los sos responsables a sentase col restu de grupos pa llegar a setiembre con una propuesta pa que “esa reforma pola que tanto naguamos salga alantre col másimu númberu posible de votos a favor y los menos a la escontra”.

El siguiente, en setiembre o ochobre

L’axuntamientu nuevu del Plenu ta previstu pa depués del branu, previsiblemente setiembre o ochobre, enantes de los seis meses que marca’l decretu que creó’l Conseyu Asesor. Mentanto, la Comisión Permanente va siguir col so trabayu y va exercer el so llabor de coordinación de los grupos de trabayu, ente otres funciones.

Na semeya, Piñán participa nel Plenu constituyente del Conseyu Asesor de Política Llingüística telemáticu celebráu n'ochobre.