El Plenu del Ayuntamientu de Lleón aprueba una moción de sofitu a l’autonomía lleonesa

La moción presentada por Unión del Pueblo Leonés (UPL) en defensa del “derechu a la constitución como comunidá autónoma de la Rexón Lleonesa conformada por Lleón, Zamora y Salamanca”, afalando a la Junta a entamar los trámites pa ello, salió alantre col sofitu del PSOE y Podemos. PP y Ciudadanos votaron en contra.

En payares l’alcalde, el socialista José Antonio Díez Díaz, yá afirmara que “Lleón tien tol derechu del mundu, como reinu históricu, a forma una comunidá autónoma propia”. Un mes depués confirmara esti sentir sofitando la moción presentada por UPL pa remitir a la Junta de Castilla y Lleón el derechu de Lleón, Zamora y Salamanca de contar con autonomía.

“Ye induldable qu’un lleonés nun se sentirá nunca castellanu por una razón obvia: porque nun lo ye; y viceversa, por más que la Junta de Castilla y Lleón gaste millones d’euros en crear una indentidá, en reescribir la historia, pa facela común”, señaló güei nel Plenu, afondando nos desiquilibrios económicos y demográficos que sufren los territorios lleoneses pol centralismu de la comunidá autónoma actual. Dientro de la sala, una pancarta favoratible a l’autonomía y banderes de Lleón, y fuera, una concentración de sofitu entamada por Conceyu País Llionés, Raigañu, Esllabón Lleonesista, Xuníos por un Reinu, Plataforma Pro-Identidad Leonesa, Lliga Celta Llionesa, Xuntanza, Ciudadanos del Reino de León, Asociación Cultural Montaña de Vadinia, Plataforma Futuro Región Leonesa, Nos Terra Maire y Ágora País Llionés.

Tres les intervenciones de los voceros de los diferentes grupos municipales llegaría la votación, que salía alantre por 14 votos a favor y 13 en contra.