El Plenu de Xixón aprueba una declaración institucional de sofitu al SNL y respetu al asturianu

|
Plenu de Xixón declaración institucional sofitu al SNL

El Partido Popular (PP) tornó a quedar solu na so cruzada contra la llingua asturiana. Esta vegada foi en Xixón, onde’l Plenu municipal aprobó una declaración institucional de sofitu a la Oficina de Normalización Llingüística na que se llama tamién a “xenerar un clima de consensu y respetu al rodiu del idioma”.

Foro, PSOE, Xixón Sí Puede, Izquierda Xunida (IX) y Ciudadanos votaron ayeri a favor de la ‘Propuesta de Declaración Institucional en Defensa de la Oficina de Normalización Llingüística de Xixón’ que llevó Iniciativa pol Asturianu a los grupos municipales “dempués de recibir esti muérganu y l’idioma ataques enllenos de radicalidá y falta d’empatía de dalgún partíu políticu que nun faen más que llevar a los que los faen a la marxinalidá, pues tán fuera de la realidá y lloñe del apreciu y el cariñu que los y les xixoneses tienen pa col asturianu”. Ensin nomalu, referíase al únicu partíu que s’opunxo a la mesma, el PP, en concretu poles pallabres de Pablo González Menéndez, voceru municipal popular, que llegó a afirmar que l’asturianu nun tenía demanda social nel conceyu y que los que quixeren ‘imponer’ l’idioma llariegu diben facelo “perriba del nuesu cadabre”.

Sicasí, los populares sí plantegaron apoyar la propuesta parcialmente, esto ye, retirando’l puntu que se refería a “la defensa del Plan de Normalización aprobáu por PSOE, Foro, Xixón Sí Puede, Izquierda Xunida y Ciudadanos”. L’argumentu yera qu’ellos nun la votaron nel so momentu y que sería una contradicción y, énte la negativa d’Iniciativa pol Asturianu de quitar dicha referencia por ser una parte importante del espíritu de la propuesta, decidieron finalmente oponese.

El documentu aprobáu, que s’encargó de defender el presidente del coleutivu, Inaciu Galán, consta de seis puntos. El primeru refierse al “sofitu del Plenu de Xixón a la Oficina de Normalización Llingüística de Xixón y a los/les trabayadores”, pa siguir col apoyu a la defensa del so llabor nos sos 15 años de vida, a les sos campañes, al Plan de Normalización Llinguística, el respetu a los entes que trabayen pola so normalización y el llamáu a “xenerar un clima de consensu y respetu al rodiu del idioma”.

Mandatu constitucional

“Esta propuesta de declaración que facemos nun ye contra naide nin contra nengún grupu d’esta institución, sinón que quier precisamente sumar. Facemos un llamáu a tolos grupos políticos equí representaos pa dar güei un exemplu de consensu alredor d’un elementu patrimonial de la importancia d’un idioma y la cultura que lu acompaña”, espresó Galán na so intervención, na que encamentó a los grupos municipales a que “sigan llevando alantre les midíes acordaes y necesaries. Al nuesu paecer habría facese más rápido, anque reconocemos que, en xeneral, vienen dándose pasos alantre. Y nun se pue negar que fueron mui bien acoyíos pola sociedá xixonesa”.

Amás añadió que “la protección de les llingües d’España ye un consensu presente na sociedá y nes instituciones dende los tiempos de la Transición. Y nun ye namás una voluntá política d’un partíu o dellos, sinón que ye un mandatu constitucional”.

Contador Estadistiques