El Plenu de Xixón refuga sofitar la oficialidá del asturianu

Cola astención de Foro y los votos contrarios de PSOE, PP y Ciudadanos. Mentes, aprueba defender les corríes de toros.

Según informa na so cuenta en Twitter Mario Suárez del Fueyo, cabezaleru de Xixón Sí Puede, el sofitu del Conceyu de Xixón a la oficialidá del asturianu tratóse en Plenu y nun salió alantre pola astención de Foro (8 conceyales). PSOE (7), PP (3) y Ciudadanos (1) votaron en contra, mientres que Xixón Sí Puede (6) y IX (2) fixéronlo a favor, nun saliendo alantre la iniciativa por 11 votos a 8.

Otra manera, el Plenu de Xixón aprobó ayeri blindar les corríes de toros nel conceyu tres l’astención del PSOE. La iniciativa del PP pa defender los festexos taurinos y refugar la prohibición de los mesmos nel conceyu tuvo’l sofitu de Foro y Ciudadanos. Mentes, votaron en contra tanto Xixón Sí Puede como IX.

Fuera, na Plaza Mayor, dos centenares de manifestantes protestaron contra la tortura a estos animales convocaos por Anadel. Éstos llamentaron la postura de los socialistes, a los qu’acusaron de nun querer perder votos.