El Plenu de Llanera aprueba por unanimidá l'espediente que recupera la toponimia tradicional del conceyu

Los seis partíos con representación nel Conceyu de Llanera, PSOE, Podemos, PP, Izquierda Xunida-IAS, Ciudadanos y VOX, votaron en Plenu a favor del espediente que rexistra los sos topónimos tradicionales, que van ser los oficiales tres el preste definitivu del Conseyu de Gobiernu. La solución escoyida finalmente en Pruvia son los nomes Pruvia Riba y Pruvia pa lo que se llamaba ‘Pruvia de Abajo’.

Depués de numberosos alderiques con coleutivos vecinales nos meses últimos, que llevó a efeutuar pequeñes modificaciones nel informe presentáu por Fernando Álvarez-Balbuena n’avientu tres un añu de trabayu de campu, ésti llevóse a Plenu ayeri, onde s’aprobó por unanimidá. Finalmente’l PP, el qu’amosara más refugu a la revisión toponímica, apoyó la recuperación de los nomes de llugar al nun producise finalmente movimientos de barrios entes les entidaes actuales, como reclamaba.

La toponimia d’esta parroquia foi la que más alderique creo por mor de la postura de l’Asociación de Vecinos de Pruvia de Arriba (Asvepru), contestada por otros habitantes del llugar. Finalmente, la opción escoyida, al tener que caltener la división de 7 barrios actual, inventada nel 1987 pa favorecer la instalación de la rede telefónica, foi la de nomar Pruvia de Riba a lo qu'hasta agora yera ‘Pruvia de Arriba’, y emplegar definitivamente Pruvia –llegó a proponese Fozalguera– pa lo que se llamó naquel momentu ‘Pruvia de Abajo’.

Amás, el Conceyu va proceder darréu a entamar colos trámites pa volver a la división anterior de 12 barios, confirma la conceyala de Dinamización Social y Comunitaria, María Isabel Fernández Álvarez, responsable de Política Llingüística. Asina se pretende finar dafechu colos problemes esistentes anguaño na numberación de la parroquia, lo que crea complicaciones a los vecinos a la hora recurrir a servicios sanitarios o de paquetería.

“Fiel a la realidá”

La edil de Podemos, encargada de falar colos coleutivos vecinales estos meses, rescampla’l trabayu fechu por Álvarez-Balbuena, “fiel a la realidá, ensin contaminación política nenguna”, que, tres l’aprobación del Plenu, pon el ramu de 17 años de llabor de la Xunta Asesora de Toponimia en Llanera, dende que nel 2004 s'abriera l'espediente cola firma d'Avelino Sánchez, presentando hasta cinco informes diferentes nesti tiempu. “Toi mui satisfecha. Pa min ye un arguyu que saliera alantre y col apoyu de tolos grupos”, añade al tiempu qu’esplica que se trata “de protexer un tesoru. La única manera de protexer una llingua ye falándola y la toponimia va da-y una mayor visibilidá”.

Llanera ta gobernada pol PSOE, con 9 conceyales, xunto con Podemos, con Fernández Álvarez como única represenante. Tán na oposición el PP, con 4, y IX-IAS, Ciudadanos y VOX –formación con una política belixerante pa col idioma que sorprendió col so votu favoratible a esta cuestión–, con 1.

L'alderique sobre l'espediente toponímicu entama nel minutu 43.