El Plenu de Grau ratifica les ordenances d’asturianu tres les alegaciones del PP

El procesu d’entrada en vigor de les ordenances d’asturianu de Grau sigue’l so cursu depués de la ratificación del documentu pol Plenu tres les alegaciones presentaes pol PP. Foro y los cuatro conceyales non adscritos, ex populares, votaron en contra.

Aprobaes el 31 d’ochobre, tres tener que repetir un Plenu por un defeutu de forma na so convocatoria, pasaron a tar n’información pública pa la presentación posible d’alegaciones. Les úniques llegaron al traviés del PP llocal –ensin representación tres la salida del partíu de los sos cuatro ediles–y basáronse nel argumentariu habitual de la formación nestos casos.

La supuesta anticonstitucionalidá de les ordenances, les obligaciones que conllevaría, el gastu de perres y la oposición a que suponga un méritu pa l’accesu a determinaos puestos d’emplegu públicu foron dalgunes de les alegaciones presentaes a un documentu “que consideren qu’encubiertamente ta pidiendo la cooficialidá, dalgo qu’en nengún sitiu apaez”, espresa Plácido Rodríguez Fernández, conceyal de Cultura, Desarrollu Llocal y Comunicación, y persona que s’encargó de defender les ordenances. “El PP ye un partíu que fai de menos a la llingua asturiana y la posición del so líder, Pablo Casado, ye’l meyor exemplu. Equí lo que faen ye sigui-y la corriente”, apunta.

Un informe encargáu pol equipu de gobiernu d’Izquierda Xunida (IX) a la téunica nueva del Serviciu de Normalización Llingüística de Grau-Candamu, Rebeca San Martín, desestimaba toles alegaciones, polo que’l documentu tornaba ayeri a llevase a Plenu. Nel alderique, tanto José Ramón González González, voceru de los ediles non adscritos, como la edil única de Foro, Patricia Álvarez Díaz, tornaron a amosar la so disconformidá coles ordenances d’asturianu.

Nel casu de la conceyala del partíu asturianu, qu’aseguró nun tar en contra del asturianu, apuntó que valorar l’idioma como méritu nes oposiciones ye una puerta abierta a la colocación de persones. La so posición final foi refugar les ordenances, polo qu’éstes s’aprobaron por 12 votos (los 9 d’IX y los 3 del PSOE) a 5.

A la espera de la so espublización nel BOPA

Agora, tres el preste definitivu del Plenu, hai qu’esperar unos díes pa la so espublización nel BOPA, momentu nel que va entrar en vigor el documentu. “Foi un procesu que llevó tiempu. Primeru decidimos crear la oficina de normalización pa la concienciación de la xente; que viera que s’entamaben actividaes que nun suponíen nenguna obligación nin imposición; que les ordenances diben ser permisives”, rellata Rodríguez Fernández.

Y ye qu’éstes tienen l’oxetivu de que la ciudadanía “pueda, en llibertá, elexir en qué llingua quier espresase cola alministración, ensin nengún tipu d’obligación”.