El Plan de Vivienda 2018-2021 llega al 104 por cientu de la execución prevista pal so primer bieniu

Melania Álvarez García, conseyera de Derechos Sociales y Bienestar, informó esti llunes al Conseyu Autonómicu de la Vivienda que’l Plan de Vivienda 2018-2021 algama’l 104 por cientu de la execución prevista pal so primer bieniu d’aplicación. Les partíes mayores destínense a ayudes a la accesibilidá y rehabilitación, y al alquiler.

El plan, que dispón d’una inversión de 100.139.660 euros pa los sos cuatro años d’aplicación, contaba con una previsión presupuestaria pa los dos primeros exercicios de 46.658.300 euros, cantidá que se supera al llegar a una execución real de 48.500.214 euros al finar 2019. Esta mañana Álvarez dio un avance de los resultaos al Conseyu Autonómicu de la Vivienda.

Les partíes que más recursos concentraron nesti periodu foron les destinaes a les ayudes a l’accesibilidá y rehabilitación, con 16,1 millones, y al alquiler, con 16 millones, asina como a la inversión en mantenimientu y ameyoramientu del parque públicu, con 6,9 millones. L’apuesta del Gobiernu por fomentar l’accesibilidá de les edificaciones y ameyorar la so eficiencia enerxética materialízase nos 5.483.000 euros que recibirán dambos conceptos nel 2020 de la partida global de 26.048.069 euros prevista pa esti añu.

El direutor xeneral de Vivienda, Fermín Bravo, esplicó que “los nuesos cálculos apunten a que la execución del plan tamién superará les previsiones nesti exerciciu”. El Plan de Vivienda 2018-2021 tien como oxetivos el posibilitar l’accesu a una vivienda asequible, lluchar contra la esclusión residencial garantizando un llar dignu y consolidar un parque inmobiliariu accesible y sostenible.

Na semeya, Álvarez García y Bravo, nel centru, na xunta del Conseyu Autonómicu de Vivienda.