El Plan de Salvamentu en Playes moviliza a 320 profesionales

Esti martes presentóse en La Franca’l Plan de Salvamentu en Playes del Principáu d'Asturies (Sapla) pa esti branu. Van movilizase 320 profesionales ente llancheros, socorristes y coordinadores municipales en 18 conceyos, el mayor dispositivu en diez años.

“Esti plan especial permítenos atender les incidencies que se produzan a lo llargo de les 211 playes qu’alcontramos nos 483 quilómetros de mariña asturiana y establecer puestos de salvamentu, con personal socorrista, en 66 sableres de los 18 conceyos que collaboren, 59 d'ellos con serviciu diariu y 7 de fin de selmana”, esplicó'l conseyeru de Presidencia y Participación Ciudadana, Guillermo Martínez. Esti preséu va caltenese operativu hasta'l 30 de setiembre y incorpora siete playes de Xixón que, a pesar de disponer de serviciu de salvamentu propiu, va actuar de manera coordinada col Serviciu d'Emerxencies d'Asturies (Sepa).

El Gobiernu asturianu apurre a la execución d'estos convenios una partida de 300.000 euros destinada a sufragar la incorporación de los socorristes y los profesionales encargaos de les llanches, que van tar trabayando ente les 12 y les 19 hores, amás d'otros 71.000 euros pa costiar el material necesariu pa desarrollar el serviciu. A esta financiación súmase tamién otros gastos qu'asume'l Sepa como la cesión del usu d’equipos diversos, el costu de los arriendos de los puestos móviles de salvamentu nes sableres onde nun disponen de puntos fixos y el vestuariu y equipamientu de los socorristes.

Nel 2016, y al amparu del Sapla, realizáronse 11.825 intervenciones, el tercer añu con menos incidencies dende’l 2007, de les que'l 90 por cientu debióse a actuaciones d'asistencia sanitaria de primeros auxilios atendíes polos servicios ordinarios adscritos a les playes nos puestos de salvamentu, y sólo en 104 ocasiones requiróse'l treslláu de los afeutaos a centros sanitarios. En total, efectuáronse 174 rescates, 54 con ayuda d'embarcaciones o motos de salvamentu,y 116 de manera direuta polos socorristes.