El pelotón de la Vuelta a Asturies echa a andar con Carapaz nes sos files

L'ecuatorianu del Movistar va buscar repetir trunfu n'Uviéu, con Landa como alternativa.

Esta mañana echó a andar la LXII Vuelta a Asturies Julio Álvarez 'Mendo', que torna a disputase en trés etapes que van poder siguise en direuto per TPA nos sos quilómetros últimos. La primera tien salida n'Uviéu y final en La Pola Ḷḷena, con pasu previu pel altu de Carabanzo en dos ocasiones, lo que va animar la carrera.

Mañana va tomar salida en Soto Ribera, pa finar na cai Uría de Cangas tres xubir L’Acebu, que nesta ocasión nun ye meta como ye vezu na Vuelta a Asturies. Por último, el domingu el pelotón va percorrer la distancia ente Cangas y Uviéu, con pasu per El Violéu a ocho quilómetros de la meta, xubida que pue ser clave pa la xeneral.

Richard Carapaz, ganador del añu pasáu, ye la principal estrella de la carrera con permisu de Mikel Landa. Ye posible qu'ente los dos ciclistes del Movistar tea'l vencedor final, anque la carrera asturiana vien siendo proclive a sorpreses protagonizaes por promeses moces.

Ausencia d'Alarcón

Un total de 16 equipos tomaron güei la salida n'Uviéu, de los que namái ún ye de categoría UCI WorldTeam, con otros siete Continental. Na llista de participantes tamién ta Beñat Intxausti, ganador de la Vuelta a Asturies nel 2012, que corre nes files del Euskadi Basque Country-Murias, mentes que ta ausente Raúl Alarcón, vencedor nel 2017, que nun acude col W52-Porto a pesar de que se contaba cola so participación, y va correr el Troféu O Jogo en Portugal.