El peligru d'un sucedaneu yankee del Cabrales

|
El peligru d'un sucedaneu yankee del Cabrales

Les DOP asturianes queden fuera de la negociación del TTIP. Namái 25 indicaciones xeográfiques correspuenden al Estáu pal so reconocimientu por Estaos Xuníos y nenguna d'elles ye asturiana. "Podríen facer un sucedaneu del Cabrales ellí y vendelu como Cabrales", afirma la diputada de Podemos Paula Valero.

La filtración fecha por Greenpeace Holanda del conveniu de l'Asociación Transatlántica pal Comerciu y la Inversión, TTIP poles sos sigles n'inglés, negociáu en secretu por Estaos Xuníos y la Xunión Europea, desatapó la esistencia d'un llistáu de DOP europees que respetaría'l país americanu como esceición a la so política de nun reconocer les proteiciones territoriales. Nella nun hai nenguna asturiana, motivu pol que Podemos va entrugar güei na Xunta Xeneral a la conseyera de Desarrollu Rural y Recursos Naturales, María Jesús Álvarez González.

"Da la sensación que nos tán ocultando dalgo", señala Valero, que critica "la falta de tresparencia del Gobiernu al aceptar dalgunes denominaciones d'orixe y otres non". La diputada entiende que ye posible que la conseyera desconoza tamién esta situación al negociase en secretu al más altu nivel, pero recuerda la votación del Plenu del 9 d'ochobre, cuando Podemos llevó una Proposición non de Llei na Xunta Xeneral na que se solicitaba al Gobiernu estatal que se posicionase en contra del TTIP, propuesta que la FSA-PSOE nun apoyó. Tampoco nun lo fixeron el PP, Foro y Ciudadanos, sofitándolo namái Izquierda Xunida.

Agora, una vegada filtraos los documentos del conveniu del TTIP, conozse que nenguna de les DOP asturianes tán nuna llista na que sí tán, por poner un exemplu, los quesos Manchego, Mahón, Idiazabal y Tetilla. "Esto significa que podríen facer un sucedaneu del Cabrales n'Estaos Xuníos y vendelu como Cabrales", afirma Valero, que tamién apunta la posibilidá de denuncia dende l'otru llau de charcu contra cualquiera de les DOP nun incluyíes nel alcuerdu "nel casu de qu'a dalguien-y interesare". Asina, esplica que yá se produz vinu de Jerez en California como si fora Jerez, o quesu griegu.

Posibilidá de frenar el TTIP

"Lo que diba ser una oportunidá pal libru comerciu", en referencia a la postura defendida pol PP, "conviértese na perda más estreldosa de les garantíes de proteición pa les denominaciones d'orixe asturianes. Lo verdaderamente apocalípticu ye que nin una sola DOP d'Asturies –nin el Cabrales, ni el Gamonéu, nin l’Afuega’l Pitu, nin el Casín, pero tampoco la sidra asturiana y les fabes– serán oxetu de defensa de la denominación del orixe de la so producción por parte del Gobiernu español nes negociaciones europees con Estaos Xuníos del TTIP", afirma la diputada.

Sicasí, Valero recuerda qu'entovía tamos a tiempu de frenar esti alcuerdu de llibre comerciu y, por ello, va interpelar a la conseyera sobre "qué midíes va tomar la so  conseyería, énte la desapaición futura de los productos agroalimentarios d'orixe asturianu cola Asociación Transatlántica pal Comerciu y la Inversión, y qué postura apoya'l so partíu en Bruxeles énte esti tratáu".

Na semeya, Valero muestra na so intervención del Plenu del 9 d'ochobre una botella de sidra cola etiqueta d'una conocida marca de refrescos estauxunidense.

AdxuntuTamañu
PDF icon llista_de_dop_pal_ttip.pdf410.54 KB
Contador Estadistiques