El Pegollu de la XDLA ye pa la empresa Reteyaores

La Xunta pola Defensa de la Llingua Asturiana (XDLA) dio a conocer esti miércoles los ganadores de los XXXII Premios Andrés Solar. La empresa Reteyaores lleva’l Pegollu, mentes que la estaya negativa, el Madreñazu, ye pa la Delegación del Gobiernu estatal n'Asturies na persona de Gabino de Lorenzo.

Un xuráu encargóse de seleicionar a los merecedores de los XXXII Premios Andrés Solar ente toles candidatures presentaes. El Pegollu, el gallardón que reconoz a una entidá o persona que rescamplara pol so llabor en defensa o promoción del asturianu, recayó nesta ocasión en Reteyaores, “empresa del sector de la construcción que vien llevando alantre’l so llabor con especial procuru nel tratamientu y usu del asturianu en tolos soportes comerciales y sociales que manexa”. La firma con sede en Sariegu asocede nel palmarés a Sidra L’Allume.

El Madreñazu, l’antipremiu que la XDLA entrega “a la persona o entidá que rescamplara pol so llabor negativu pa cola llingua asturiana”, foi mentes pa la Delegación del Gobiernu estatal n’Asturies, en concreto pal so máximu responsable, Gabino de Lorenzo, “poles sos acciones y midíes rancies, discriminatories y contra derechu que toma valiéndose d’instituciones, cargos y perres públiques”. L’añu pasáu el Madreñazu recayó nel discursu antiasturianu de delles instituciones y medios de comunicación, exemplificáu nel ‘casu Miguel Alarcos’.

Vienres 16

La gala d’entrega de los XXXII Premios Andrés Solar, que recuerden al escritor fináu n’accidente de tráficu nel 1984 a los 29 años d’edá, va celebrase’l vienres 16 nel xixonés Centru de Cultura Antiguu Institutu a partir de les 19.30 hores. Nesta ocasión, el toque musical va correr a cargu de L-R (Leticia González & Rubén Bada).

Depués del actu, la XDLA va celebrar la tradicional espicha, qu’esti añu va celebrase na sidrería La Xuanina (Caveda, 7), pa la que ye necesario acutar plaza nel teléfonu 985.22.95.53 o nel corréu electrónicu info@exunta.org. El preciu ye de 21 euros.