El PCA escoyó otra vuelta a Noemí Martín de secretaria xeneral

Nun hebo sorpresa nel octavu congresu del Partíu Comunista d'Asturies, nel que la dirección vixente, encabezada por Noemí Martín, salió vuelta a escoyer col sofitu del sector mayoritariu tres d'escluyise del procesu la corriente crítica y col votu en contra de la "tercer vía" representada mayormente pola agrupación de Llangréu.

L'ausencia nes votaciones del sector críticu, que tenía 45 delegaos d'un total de 193, xustificóse pola postura d'esti sector encabezáu pola agrupación d'Uviéu del PCA que defende que'l congresu nun tuvo validez llegal al impugnalu la Comisión Executiva del PCE tres de detectar delles irregularidaes nel procesu precongresual que la directiva del PCA negó dafechu. El sector críticu a la directiva del PCA ye minoritariu n'Asturies pero mayoritariu nel Partíu Comunista d'España, que dirixe Francisco Frutos. El resultáu d'ello ye que tres d'esti VIII congresu la mayoría de los miembros del comité central del PCA (68) son pal grupu de Noemí Martín, quedando con una pequeña representación de 12 los de la "tercer vía".