El "Pasamentu" de Muyeres.

Dempués de cuasi cinco años del so segundu discu, esti sábadu 15 d'avientu na casa de cultura d'Avilés, preséntose'l tercer discu del colectivu Muyeres col títulu de "Pasamentu". Esta grabación sufrió un retrasu pola muerte durante la grabación del so productor, Pedro Bastarrica, pero finalmente René de Copeaud acabó de producir esti esperáu trabayu.
Esti doble cd sigue la mesma llinia que los discos anteriores: interpretación de temes tradicionales de diferentes temátiques, relixosa, villancicos dances, novenes...etc, que van dende Peñamellera hasta Ibias. Nesti discu, amas de participar los grupos que formen el colectivu Muyeres, que son Xardón y Vezos d'Asturies d'Uviéu, Concetsones de Tinéu y Escontra'l Raigañu d'Avilés, collaboren otros músicos asturianos como Xosé Ambás, de N'Arba, Diego y Pedro Pangua como gaiteru y tamboriteru, David Varela como curdionista, Belinda Álvarez y Ana Lombardía, vigulinistes y Indalecio, de los Gatos del Fornu, que participa como clarinetista, amas d'otres collaboraciones d'antiguos componentes del colectivu.
Esti discu con cincuenta canciones, convertiráse probablemente, como los dos anteriores, nuna referencia tanto pa los músicos asturianos como pal aficionáu a la música asturiana.

Contador Estadistiques