El paséu xixonés de Begoña, sede d’un mercáu de llibros d’ocasión

L’Asociación de Escritores Noveles entama esta fin de selmana nel paséu de Begoña un mercáu de llibros d’ocasión solidariu pa celebrar el Día del Llibru. Tolos beneficios d’esta iniciativa van dir pa l’Asociación Xixonesa de Caridá-Cocina Económica.
 
L’alcaldesa de Xixón, Paz Fernández Felguerosos, y personalidaes de la vida política, social y cultural de la ciudá yá confirmaren la so presencia nesta cita que va inaugurase esta tarde, a les 18 hores. Nesta primer xornada, l’horariu d’apertura de la carpa que va situase nel paséu de Begoña, a l’altura de la cai Anselmo Cifuentes, ta previsto a les 18 hores, mentes que’l piesllu va facese a les 20.30 hores. El mercáu tamién va tar abiertu mañana de 10.30 a 13.30 hores y de 17 a 20.30 hores; y el domingu, de 10.30 a 13.30 hores.
 
Los precios de tolos llibros van ser populares, siendo’l máximu estipuláu pola organización de 10 euros. Hai que destacar que tolos exemplares a la venta son donaos por particulares o por entidaes. Los beneficios poles ventes de llibros nestos tres díes van dir pa l’Asociación Xixonesa de Caridá-Cocina Económica, entidá que ta viendo como la demanda de los sos servicios ta aumentando nos meses últimos por mor de la crisis económica.