El paru ye’l principal esmolecimientu de los asturianos, que nun asitien a la inmigración ente les sos preocupaciones

|
Paru primer problema CIS avientu 2018

El barómetru d’avientu del Centru d’Investigaciones Sociolóxiques (CIS) dexó dellos datos interesantes. Asturies destaca como la comunidá onde más esmolez el paru, el problema más importante pa 6 de cada 10 encuestaos, y asítiase ente les que menos considera la inmigración como tal: 1 de cada 10, al igual que la emigración.

El paru ye la primera respuesta espontánea en tol Estáu a la entruga ‘¿Cuál ye, al so parecer, el principal problema qu’esiste anguaño n’España?’, a la que sigue otra sobre'l segundu y el terceru. Asturies ye la comunidá autónoma nel que más esmolez, con un 60 por cientu, casi’l doble de la media estatal, que s’asitia nun 36,1 por cientu.

Los siguientes na llista son Extremadura (55,3 por cientu) y Galicia (44,9 por cientu). Nel llau contrariu tán Catalunya (18,6 por cientu), la ciudá autónoma de Ceuta (20 por cientu) y La Rioja (25 por cientu).

El segundu problema que rescampla la encuesta a nivel estatal ye los políticos, con un 14,8 por cientu, cifra que n’Asturies algama un 8 por cientu. Mentes el terceru ye la corrupción y el fraude, con un 10,7 por cientu, un 9,3 por cientu n’Asturies.

Pa les asturianes y asturianos, mentes, el segundu ye la corrupción y el fraude, y el terceru los políticos. Tamién foron citaos los problemes económicos (5,9 por cientu), la calidá del emplegu (4), los problemes sociales (4), la independencia de Catalunya (2,7), les pensiones (1,3), la crisis de valores (1,3), el Gobiernu estatal y partíos concretos (1,3), la inmigración (1,3) y la emigración (1,3).

Movilidá llaboral

Ente los datos onde s’atopen diferencies destacaes con respeuto a otres comunidaes destaca la inmigración y la emigración. El primeru resulta un problema pal 1,3 por cientu de los asturianos, cuando la media estatal ye del 3,1 por cientu con territorios como Aragón, Castilla y Lleón y La Rioja que superen el 5 por cientu.

Nel llau contrariu ta Cantabria, Navarra y les dos ciudaes autónomes, nes que nun se cita como tal. Mentes, la marcha de los sos ciudadanos fuera de la comunidá obligaos pola situación llaboral ye un esmolecimientu namái p’asturianos (1,3), baleares (1,5), murcianos (1,2) y catalanes (0,4).

Contador Estadistiques