El paru sigue la so baxada y algama la meyor cifra dende avientu del 2008

Asturies zarró xunetu con 7.194 paraos menos, lo que dexa la cifra total de demandantes d’emplegu en 65.165, convirtiéndose na segunda autonomía con mayor descensu depués d’Illes Balears. Ye la cifra más baxa dende avientu del 2008, cuando l’añu terminó con 63.614.

Les cifres son asemeyaes a les del branu del 2019, ameyorándoles, confirmando la recuperación del mercáu llaboral depués de que pasaran los momentos más duros de la pandemia de COVID-19 coincidiendo col avance de la campaña de vacunación. Asina, acumúlense 5 meses de descensu, pasando de los 85.781 paraos en febreru a los 65.165 actuales: 20.616, un 24,03 por cientu menos.

Namái en xunetu’l desemplegu baxó en 7.194 persones, un 9,94 por cientu, superáu sólo por Illes Balears, con un 15,80 por cientu, y per delantre de la siguiente con meyor datu, Catalunya, con un 8,42 por cientu. A nivel estatal algómose’l récor históricu per tercer mes, con 197.841 persones menos, una media del 5,47 por cientu, que dexa’l total en 3.416.498.

El paru menguó n’Asturies’l mes pasáu en tolos sectores d’actividá, rescamplando los servicios y la industria, que baxa de los 5.000, una cantidá que nun se vía dende'l 2005; en dambos sexos; y en tolos grupos de edá, sobre manera ente menores de 25 años, con una caída de 19,54 por cientu, lo que supón que cerca d’un millar. En comparación con xunetu del 2020, baxó nesti coleutivu un 23,93 por cientu.

A nivel interañal, Asturies cuenta con 12.468 paraos menos, un 16,06 por cientu, meyor tamién que la media estatal, que ta nel 9,45 por cientu. Les autonomíes con meyores datos son Illes Balears (26,15 por cientu), Melilla (24,67) y Euskadi (16,85), mentes que piesllen la llista Canarias (1,38), Comunidad de Madrid (1,92) y Comunitat Valenciana (2,77).

Mayor afiliciación a la Seguridá Social dende’l 2011

En xunetu contabilizáronse 32.955 contratos, un 10,76 por cientu más que’l mes anterior, de los que 2.203 foron indefiníos. Esta evolución traduzse nel aumentu de les afiliaciones a la Seguridá Social en 4.753 persones, hasta llegar a 371.262, una cifra que nun s’algamaba dende’l 2011.

El númberu de cotizantes creció’l 1,29 por cientu esti mes, mientres que nel añu últimu recuperáronse 10.976 puestos de trabayu. Otra manera, la cifra de persones n’ERTE sigue baxando y ta agora en 5.014, 2.366 menos qu’en xunu.