El paru nun dexa de medrar: Asturies cuenta yá con 105.216 desemplegaos

El mes de payares rexistró 1.832 paraos más nel país, lo que dexa la cifra total de desemplegaos en 105.216. Asturies ye’l territoriu estatal onde más medró’l paru nel añu últimu, un 18,42 por cientu, namái superáu por Melilla (23,49 por cientu).

Sicasí, el crecimientu del númberu de desemplegaos foi menor que n’ochobre, cuando medró un 4,29 por cientu al incorporase 4.249 persones más a les llistes paru. Nesta ocasión foi del 1,77 por cientu, esto ye, 1.832 paraos. Mentes, la media estatal foi del 1,54 por cientu al rexistrar 74.296 persones más ensin emplegu, que sitúen el total en 4.907.817, según les cifres aportaes güei pol Ministeriu d’Emplegu y Seguridá Social. Les comunidaes que presentaron peores cifres foron Illes Balears (10,59 por cientu), La Rioja (4,07 por cientu) y Cantabria (3,43 por cientu). Por contra, l’únicu territoriu que consiguió rebaxar el paru foi la Comunitat Valenciana (-0,54 por cientu).

No que respeuta a la tasa interañal, Asturies sitúase na segunda posición a nivel estatal tres sumar 16.363 paraos nestos 12 meses últimos, lo que supón una medra del 18,42 por cientu, cuando la media estatal ye del 11,02 por cientu (487.355 paraos más). Nesta clasificación, liderada por Melilla (23,49 por cientu), la tercer clasificada ye Euskadi (18 por cientu). Pese a los malos datos del mes pasáu, Illes Balears consigue cifres positivos nesta estaya al descender nes islles mediterránees el desemplegu un 0,97 por cientu en comparanza con payares del 2011.