El paru medra n’Asturies en 1.548 persones nun mes d'ochobre d’aumentu del emplegu

N'ochobre rexistróse un aumentu del paru n’Asturies en 1.548 persones, enllazando dos meses de medría de demandantes de trabayu cuando la tendencia estatal ye descendente. Por contra la Seguridá Social tuvo 1.593 afiliaos más y la contratación creció nun 8,84 por cientu.

Si en setiembre Asturies lideró la medra del desemplegu (4,12 por cientu), nesta ocasión ye la quinta autonomía con peores datos, per detrás de Melilla (5,43 por cientu), Illes Balers (5,38), Estremaúra (2,74) y Murcia (2,43). Nel últimu mes la cifra baxó al 2,41 por cientu, perriba tamién de la media estatal, que quedó nun -0,02 por cientu al perder 734 paraos, primer vegada con ameyoramientu de datos n’ochobre dende qu’hai rexistros, esto ye, dende’l 1975.

El total de desemplegaos ye agora de 3.257.068, mentes que n’Asturies asítiase en 65.756, la cantidá más baxa nesti mes dende’l 2008. Les autonomíes con meyores cifres son Ceuta (-2,83) Canarias (-2,45) y la Comunidad de Madrid (-2,39).

El desemplegu aumentó en tolos tramos d’edá y en tolos sectores, sacante la construcción, onde baxó’l 0,86 por cientu. Alredor de siete de cada diez nueves persones al paru correspuenden al sector servicios.

En comparanza col añu pasáu, el paru baxó n’Asturies en 13.948 persones, lo que supón una mengua del 17,50 por cientu, mayor que la media estatal, que quedó nun 14,87 por cientu al rexistrar 568.975 desemplegaos menos. Los meyores datos son los de Illes Balears (36,44), Catalunya (22) y Canarias (20,64), mentes que’l descensu menor dase en Comunitat Valenciana (3,04), Cantabria (5,42) y la Comunidad de Madrid (6,70).

Mínimu de persones n’ERTE

L’emplegu tornó a medrar n’Asturies n’ochobre, con un aumentu nes afiliaciones a la Seguridá Social de 1.593 persones (0,43 por cientu) y un repique fuerte de la contratación, sobre manera la de calter indefiníu. El país zarró l’últimu mes con una afiliación media de 368.117 cotizantes, lo que supón alredor de 6.000 afiliaos nuevos en comparanza con ochobre del añu pasáu, lo qu’en términos porcentuales ye un aumentu del 1,65 por cientu.

Esta evolución positiva compruébase tamién al analizar les cifres mensuales de contratación, que dan una medría del 8,84 por cientu, hasta sumar 31.171 emplegos nuevos. Esto supón que n’ochobre firmáronse n’Asturies 1.005 contratos diarios de media, un 24,93 por cientu más que nel mesmu mes del 2020.

Ochobre tamién remató con un mínimu de 3.233 persones n’Espedientes de Regulación Temporal d’Emplegu (ERTE), concretamente 1.434 homes y 1.799 muyeres. D’alcuerdu colos datos de la Seguridá Social, son 675 menos qu’en setiembre.

Amás, 1.514 empreses caltienen persones n’ERTE nel país, 300 menos que’l mes pasáu.