El paru baxó nel mes de mayu en 2.159 persones

La baxada foi del 2,98 por cientu, superior a la media estatal, del 2,66 por cientu.

Asturies finó'l mes de mayu con un total de 70.197 desemplegaos, la cifra más baxa rexistrada nesti mes dende'l 2008, según los datos aportaos pol Ministeriu de Trabayu, Migraciones y Seguridá Social. La cayida del paru foi xeneralizada, tanto ente homes y muyeres como en toles edaes y sectores, y supón el sesentenu octavu mes de descensu interañal siguíu.

El territoriu con mayor baxada foi Illes Balears, por mor del turismu, con un 13,04 por cientu; La Rioja, con un 6,14 por cientu; y Murcia, con un 4,05 por cientu. Nel llau contrariu tán Ceuta, únicu llugar onde medra (0,51); Canarias, con una mengua del 0,76 por cientu; y Melilla, del 1,12 por cientu.

En términos añales, Asturies resixtró un descensu de 3.423 persones, esto ye, un 4,65 por cientu, inferior a la media estatal, que foi del 5,31 por cientu. Los meyores datos diéronse n'Extremadura (9,20 por cientu), Melilla (9,11 por cientu) y Galicia (8,99 por cientu), mentes que los más baxos rexistráronse n'Illes Balears (0,44 por cientu), Ceuta (2,62 por cientu) y Canarias (3 por cientu).

Mayor afiliación a la Seguridá Social

Mayu tamién foi positivu pa l'afiliación a la Seguridá Social: creció un 0,68 por cientu y Asturias cuenta güei con 366.921 cotizantes, 2.484 más que'l mes pasáu. En términos interañales la medra ellevóse a 4.289 persones, un 1,18 por cientu más.