El paru baxó en xunetu en 2.488 persones

L'Institutu Nacional d'Emplegu ta acabante de colgar na rede los datos de paru y contratación llaboral referentes al mes de xunetu. Según la estadística oficial, el paru baxó en xunetu del 2.004 en 2.488 persones, un 4,84% respective a xunu, lo qu'asitia la tasa de paru asturiana nel 11,30%. Estos datos danse nun contestu de baxada xeneralizada del paru en tol estáu como yá ye normal na temporada de veranu, cuando la contratación nel sector servicios xube esponencialmente, anque nesti mes tolos sectores tiraron pela baxada, con 36 paraos menos n'agricultura (-8,22%) 134 n'industria (-2,81%) y 187 en construcción (-3,23%), anque evidentemente ye'l sector servicios onde más se notó la baxada, con 1.689 nueves contrataciones (-5,44%).

El colectivu qu'anda tres del primer emplegu baxó en 442 persones, y la baxada del paru benefició proporcionalmente más a les muyeres qu'a los homes, anque la desproporción nesti particular sigue ehí y el 60% de los paraos asturianos son muyeres. El númberu de contratos que se firmaron en xunetu foi de 29.584, 3.338 más qu'en xunu. D'ellos, namás 1.854 foron indefiníos.

Con too y con ello, la interanual respective al mesmu mes del añu 2.003 demuestra qu'Asturies tien 294 demandantes d'emplegu más (+0,60%).

Los sindicatos mayoritarios criticaron duramente los datos acabantes de conocese, y mientres CCOO denuncia qu'esta baxada del paru ye namás estacional y que siguimos trés puntos penriba de la media estatal de paru, UXT condenó'l fechu de que la contratación temporal seya la base d'esta baxada del paru. Namás el 6% de los contratos que se firmaron fueren indefiníos, cuando la media estatal de del 8%, y por cada contratu estable que se firmó conseñáronse otros 15 a tiempu parcial. La central que dirixe Justo Rodríguez Braga criticó la falta de calidá del mercáu llaboral asturianu, nel que diz que por cada inmigrante llaboral qu'entra emigren dos asturianos.