El paru baxó en 2.160 persones n'Asturies

Algámense 42 meses de descensu interañal.

Asturies rexistró una mengua del paru de 2.160 persones nel mes de marzu, lo que supón un 2,5 por cientu en comparanza col mes anterior. El país, que cuenta agora con 84.168 paraos, ye'l cuartu territoriu con mayor baxada (1,2 puntos perriba la media), según el balance últimu del Ministeriu d’Emplegu y Seguridá Social.

Con estos númberos suménse yá 42 meses siguíos de cayida interañal. Al respective del mesmu mes del 2016, rexistráronse 6.202 paraos menos, lo qu’implica una mengua interañal del 6,86 por cientu. Hai que destacar que la baxada ye la mayor que se produz nun mes de marzu dende’l 2008.

Les altes na Seguridá Social tamién reflexen un enclín positivu porque hebo 2.910 afiliaos nuevos (0,83 por cientu), lo que xube la cifra total a 353.117 persones, 6.164 más que va un añu (1,78 por cientu).