El Partido Popular gana les eleiciones en Castilla y Lleón, pero queda lloñe de la mayoría absoluta

Va tener que gobernar en solitariu o formar un Executivu en coalición con VOX, que yá pide la vicepresidencia y conseyeríes. Unión del Pueblo Leonés (UPL) pasa de 1 a 3 procuradores.

La xugada 'a la madrilana' pretendida pol Partido Popular (PP) en Castilla y Lleón, al convocar eleiciones anticipaes pa reforciar la so posición, nun salió como esperaba Génova. Alfonso Fernando Fernández Mañueco ganó les eleiciones adelantaes, a diferencia del 2019, pero baxó en votos, con un porcentaxe del 31,43 por cientu del total, mui asemeyáu al 31,49 por cientu de les anteriores.

Sicasí, col 99,32 por cientu de los votos escrutaos, algama 2 escaños más, pa sumar un total de 31. Una cantidá lloñe de la mayoría absoluta, afitada en 41, que pon a los populares nuna situación delicada, al tener qu'optar por gobernar en solitario con apoyos puntuales, vía que'l partíu confirmó esta mañana que pretende percorrer, o formar un Executivu de coalición con VOX.

La formación de derecha estrema medra de manera importante, al pasar d'un porcentaxe de votu del 5,50 por cientu al 17,64 y algamar 13 procuradores. Nel 2019 tenía namái 1.

Ciudadanos ye'l principal perxudicáu d'esti tresvase de votos más a la derecha. La formación naranxa, que gobernaba en coalición col PP hasta la decisión de Fernández Mañuecu de cesar tolos sos cargos nel Executivu y convocar eleiciones énte una supuesta amenaza de moción de censura, pasa de 12 a 1 representes, cayendo en porcentaxe de votu del 14,94 por cientu al 4,49 por cientu.

Baxada del PSOE

Otra importante baxada protagonizóla'l PSOE, que cai de 35 a 28 procuradores. Pasa de tener el 34,48 por cientu del votu al 30,05.

Los socialistes, ensin opciones de conformar Executivu, refuguen la posibilidá d'apoyar al PP pa torgar un gobiernu de coalición con VOX nun pautu 'a la europea'. Más a la izquieda, Unidas Podemos tamién baxa representación, al perder 1 de los 2 escaños colos que contaba la candidatura Podemos-EQUO; algamó'l 5,08 por cientu de los votos, más que nel 2019, anque 7.000 votos menos.

Medra del lleonismu

UPL da un saltu importante, al algamar 3 de los 13 procuradores por Lleón. Algamó'l 21,31 por cientu de los votos, cuando nel 2019 tuvo un 10,21 por cientu y 1 representante.

El PSOE sumó 4 procuradores (28,46 por cientu), 2 menos, el PP caltién los 4 (25 por cientu) y VOX, que nun tenía representación, pasa a tener 2 (15,38 por cientu). El partíu rexonalista lleonés medra tamién en Zamora, en concretos dos puntos insuficientes pa contar con un 2,69 por cientu del total de los votos, y en Salamanca en 1.000 sofitos, quedando con un curtiu 0,96 por cientu.

Soria ¡Ya! gana

Los partíos de la nomada 'España vaciada' tamién garren puxu, rescamplando la victoria de Soria ¡Ya! con un espectacular 42,57 por cientu. Suma 3 de los 5 procuradores por Soria, 2 del PSOE, que queda con 1, al igual que'l PP, que pierde 1 tamién.

Por Ávila, mentes, repite representación aumentando en 7 puntos el so sofitu hasta algamar un 16,76 por cientu de los votos.

Menos participación

La participación nes eleiciones baxó con respeuto a la del 2019. Nesta ocasión foi del 63,44 por cientu, pol 65,79 por cientu d'hai 3 años.

A diferencia de lo qu'asocede n'Asturies o la Comunidad de Madrid, que tienen que celebrar les sos eleiciones en mayu del 2023 xunto a les municipales, la llexislatura nueva en Castilla y Lleón va ser de 4 años al contar cola ferramienta de disolver el Parllamentu y convocar eleiciones anticipaes. La reforma del so estatutu d'esta autonomía nel 2007 permite esta posibilidá, que se pretendía incluyir na modificación fallida de la norma asturiana pa incluyir la oficialidá del asturianu y del gallego-asturiano.

Na semeya, Fernández Mañueco na nueche eleutoral. Semeya propiedá del PP de Castilla y Lleón.