El Partido Popular gana les eleiciones con mayoría absoluta y suma 186 escaños, el so rexistru mayor

Mariano Rajoy va ser el presidente estatal próximu. El PP ganó les xenerales de domingu al sumar 186 escaños (44,62 por cientu del total de votos), trés más que José María Aznar nel 2000, y va tener mayoría absoluta nesta llexislatura.
 
El total de votos de los populares, a falta del recuentu de la votación per corréu, ye de 10.830.693, una cifra dalgo mayor que trés años antes, cuando rexistraron 10.278.010 (39,94 por cientu). Mentes, el PSOE d’Alfredo Pérez Rubalcaba, tuvo un resultáu permalu al pasar de 11.289.335 (43,87 por cientu) nel 2008 a 6.973.880 (29,73 por cientu). No que respeuta al númberu d’escaños, los populares consiguen 186 y los socialistes, 110 (154 y 169, de manera respeutiva, hai trés años).
 
Otres once formaciones polítiques consiguieron representación nel Congresu nestes eleiciones, lo que supón la entrada de trés partíos más que nel 2008. Asina, consiguieron escañu na Cámara baxa CiU (16 parllamentarios y 1.014.263 votos), Izquierda Xunida (11 y 1.680.810), Amaiur (7 y 333.628), UPyD (5 y 1.140.242), EAJ-PNV (5 y 323.517), Esquerra Republicana (3 y 256.393), BNG (2 y 183.279), Coalición Canarias-Nueva Canaria (2 y 143.550), Compromís-Q (1 por València y 125.150), Foro de Ciudadanos (1 y 99.173) y Geroa Bai (1 y 42.411).
 
Ente estos resultaos destaca l’ésitu de la coalición abertzale Amaiur (EA, Alternatiba, Aralar y independientes), fuercia más votada n’Euskadi, perriba del PNV y de los dos partíos estatales. Tamién l’ascensu importante d’Izquierda Xunida, que pasa de tener 2 a sumar 11 escaños, y d’UPyD, que consigue que Rosa Díez tea acompañada de 4 compañeros de partíu nesta llexislatura. Otra organización que tuvo un ascensu importante foi CiU al algamar 16 escaños, 6 más qu’hai trés años.
 
Victoria tamién nel Senáu

El PP gana tamién nel Senáu al sumar 136 senadores, 35 más que nes eleiciones pasaes. Naquella ocasión, los populares tamién rexistraron un númberu mayor que’l PSOE: 101 por 88. Agora, los socialistes pierden 40 pa quedase en 48. Nesti sen, ye importante señalar que’l PSOE presentóse por Catalunya a la Cámara alta na coalición Entesa pel Progrés de Catalunya xunto con Iniciativa per Catalunya Verds y Esquerra Unida i Alternativa (IX de Catalunya), qu’algamó 7 representantes, 5 menos qu’hai trés años (nesta coalición tamién taba Esquerra Republicana).
 
El restu de formaciones con representación nel Senáu son CiU (9), EAJ-PNV (4), Amaiur (3) y Coalición Canaria-Nueva Canarias (1).