El Partido Popular de Xixón quier un espaciu na ciudá pa “rindir homenaxe” a la bandera española

El grupu municipal del Partido Popular de Xixón presentó un ruegu al Conceyu nel que pide un espaciu na ciudá pa “rindir homenaxe” a la bandera española. Los populares esperen una respuesta del gobiernu de Foro nel Plenu del vienres.

Nuna anuncia fecha güei na so páxina web, el PP xixonés apunta que “perriba d’ideoloxíes y orientaciones polítiques, la bandera d’España simboliza la igualdá y xunidá del país, dos principios que toos debemos sofitar y defender”. Asina, quier siguir el camín d’otres ciudades del Estáu que “la exhiben y homenaxeen” en dalguna de “les sos places o aveníes principales”, ensin detallar en qué puntu de Xixón querrían asitiar esti símbolu. Por último, señala que con esta iniciativa promocionaríase “l’usu normalizáu” d’una bandera que considera “de nueso” que “toos tenemos el mesmo derechu a exhibila y la obligación de respetala”.

Esta ocurrencia sorprendente de los populares nun tiempu nel que la ciudadanía demanda otru tipu d'iniciatives y un destín diferente pa les perres públiques va tratase nel Plenu municipal del vienres. El PP xixonés destaca nel comunicáu que “l’equipu de Foro ha de responder a esta solicitú” nesa sesión.

Na semeya, Plaza Mayor de Xixón, onde ta presente la bandera española xunto cola asturiana, xixonesa y europea. Imaxe de DougManson baxo llicencia Creative Commons 3.0 Unported, 2.5 Generic, 2.0 Generic y 1.0 Generic.