El parte del tiempu p’Asturies va siguir faciéndose en Santander

El director del Centru Meteorolóxicu Territorial d'Asturies y Cantabria, José Salvador Martín, declaró esta mañana que nun entra nos planes del Institutu Nacional de Meteoroloxía l'apertura d'un Centru Meteorolóxicu n'Asturies, ello en cuantes que los avances técnicos tan permitiendo que les previsiones abarquen zones cada vegada más estenses de territoriu, polo que nun se ve preciso desdoblar el que ta asitiáu en Santander y que cubre les previsiones p'Asturies.

D'esta miente, confírmase que'l parte del tiempu p'Asturies va siguir faciéndose en Santander, dalgo que va en contra del paecer de bien d'asociaciones patronales encabezaes pola FADE, conceyos que tienen na so ufierta turística bien del so desarrollu económicu, profesionales de la hostelería y tamién partíos políticos, ente ellos munchos d'ideoloxía nacionalista, llevaben tiempu reclamando al traviés de los medios de comunicación y en foros públicos que l'INM abriere un centru meteorolóxicu n'Asturies. Los fallos del parte ellaboráu en Santander son la quexa principal y el denominador común de toles voces que piden un centru propiu p''Asturies.