El Parque Natural de Ponga va recibir meyores na señalización y caltenimientu

L'aparcamientu ecolóxicu de Les Bedules va entrar en serviciu esti mesmu mes.

Desarrollu Rural y Recursos Naturales tien programaes inversiones nel Parque Natural de Ponga por un valor de 130.000 euros hasta final d'añu, de los que casi 98.800 van dedicase a proyeutos de meyora de la señalización y al caltenimientu d'esti espaciu y les especies protexíes. Tamién van destinase 35.000 euros a trabayos de roza y ordenación agroambiental nos montes d'utilidá pública, que persiguen mesmo la prevención de quemes que la ordenación del parque, pa que los ganaderos desarrollen el so trabayu nes meyores condiciones.

La conseyera María Jesús Álvarez González presidió na tarde d'ayer les xuntes de los órganos de xestión del parque, nes que s'analizara la memoria del añu pasáu, onde s'invirtió 1,5 millones d'euros, destacó. Amás, valoró l'entamu del procedimientu alministrativu pa declarar el parque Reserva de la Biosfera: “Esti trámite va permitir que Ponga s’incorpore a esi club de calidá selectu nel qu’ha tar por méritos propios y que va sirvir pa que'l parque seya más conocíu, más valoráu y, poro, más visitáu”, precisó.

Aprovechando la xornada, visitó tamién les obres del aparcamientu ecolóxicu que'l so departamentu ta construyendo nel paraxe conocíu como Les Bedules, con una inversión que supera los 23.000 euros y capacidá pa 40 places, dos d'elles pa discapacitaos. Les obres consistieron na instalación d'un firme d'alvioles de formigón rellenes de tierra vexetal nes que se semaron granes de los praos de siega de la zona y va entrar en serviciu a lo llargo del mes.

L'estacionamientu alcuéntrase nel puntu de mayor concentración de visitantes dientro del espaciu protexíu, por cuenta de les magnífiques vistes escontra los dos valles que conformen el conceyu: el del ríu Ponga, con cumes como'l picu Tiatordos o'l Maciédome, y el del Seya, col escobiu de los Beyos y el macizu occidental de los Picos d'Europa.

Mirador del Tombu La Espinera

D'igual forma, Álvarez González averóse ayeri al mirador del Tombu La Espinera, onde ta previsto qu'empiecen unes obres d'acondicionamientu nos díes próximos, con una inversión de 7.286 euros. Ehí esplicó que la conseyería va afaer un observatoriu nel Cantar La Tozana, per aciu la regularización de la escampada y la construcción d'una rampla d'accesu.

En dambos puntos instalaráse un panel panorámicu colos perfiles montascosos y la representación de les especies más significatives de la zona.