El Parque de Picos va tener un presupuestu de 2,5 millones nel 2020

|
 Xunta del patronatu del Parque de Picos en Santander

Asturies va recibir 245.266,51 euros del Ministeriu de Transición Ecolóxica pa l'área d’influencia socioeconómica del espaciu.

El patronatu del Parque Nacional de los Picos de Europa aprobó so presupuestu pal 2020, que xube a 2.545.000 euros, ensin incluyir la partida adicional qu’apurre l’Organismo Autónomo Parque Nacionales (OAPN) pa la dotación del Centru de Receición de Visitantes de Posada de Valdeón (Lleón), que va raspiar los 1,2 millones. Na xunta, celebrada ayeri en Santander, y na que tamién se dio’l preste al plan nuevu d’actividaes del espaciu, tuvieron presentes los conseyeros del ramu d’Asturies, Alejandro Calvo; Cantabria, Guillermo Blanco; y Castilla y Lleón, Juan Carlos Suárez-Quiñones.

Amás informóse del programa de subvenciones venceyáu al área d’influencia socioeconómica del parque, correspondiente al 2019, que xube a 735.089 euros, apurríos principalmente pol Ministeriu de Transición Ecolóxica. D’ellos, a Asturies correspuenden-y 245.266,51 euros; a Castilla y Lleón otros 220.520,3, que van ser financiaos dafechu pola Alministración central; mentes que la cantidá de Cantabria, que sí va poner fondos adicionales a los del ministeriu, ye de 269.302,59 euros.

Na xunta diéronse a conocer los ameyoramientos na tramitación del Plan Rector nuevu d’Usu y Xestión del Parque, que s’atopa na fase de preparación de respuesta d’alegaciones, a les que s’espera poder dar cursu nos primeros meses del 2020. Tamién se presentaron les meyores sobre’l conveniu de collaboración nuevu ente les trés comunidaes autónomes pa la xestión coordinada del parque, en cumplimientu de la última comisión de xestión, celebrada en Camaleño (Cantabria) n’ochobre cola presencia de los presidentes de los trés territorios.

Contador Estadistiques