El país prepárase p'acoyer a un mínimu de 400 refuxaos

El Gobiernu ta peracabando un protocolu d'acoyida de refuxaos sirios que daría abellugu n'Asturies a, polo menos, 401 persones. Nesti proyeutu collaboren conceyos, Accem, Cruz Bermeya y particulares, y la intención ye aprobalu nes selmanes próximes.

El conseyeru de Presidencia y Participación Ciudadana, Guillermo Martínez, informó güei al Conseyu de Gobiernu sobre los detalles del proyeutu, que recueye al menos 401 places ente les qu'aporta Asturies (187), los conceyos (94) y les organizaciones non gubernamentales Aceem y Cruz Bermeya (116), y otres cuatro ofrecíes por particulares. El documentu inclúi los recursos habitacionales, los servicios disponibles y los mecanismos d'integración nun protocolu de 50 actuaciones coles que l'Executivu pretende garantizar l'atención integral a esti coleutivu.

El proyeutu, el segundu desendolcáu nel Estáu p'acoyer refuxaos tres Cantabria, plantega actuaciones en tres áreas principales. La primera ye la educativa, cola incorporación de midíes previes a l'acoyida del alumnáu p'abordar la eliminación de barreres d'accesu a la educación como'l tresporte escolar, el serviciu de comedor,  los recursos materiales y la disponibilidá de profesores d'inmersión llingüística. Tamién contempla orientaciones pa l'acoyida sociollingüistica y la intervención naquellos casos qu'esistan feríes psicolóxiques de guerra.

Na estaya sociosanitaria búscase garantizar l'accesu a l'asistencia y l'aplicación de los protocolos de vacunación en casu de que sía necesaria la so activación. Inclúi midíes d'asesoramientu y apoyu a muyeres refuxaes víctimes de violencia de xéneru, cola asistencia xurídica al traviés del turnu especial contra'l maltratu, y preve tamién la posibilidá d'atender a aquelles en situación de dependencia, discapacidá o desproteición con tolos recursos públicos disponibles.

Por último, nel aspeutu llaboral, incorpora recursos pa facilitar la empleabilidá del coleutivu con aiciones n'información, orientación y formación p'aquellos reasitiaos con más opciones d'integrase nel mercáu llaboral. Otra manera, como novedá, el documentu incorpora un bancu de recursos que s'actualizará periódicamente pa conocer en too momentu los medios disponibles colos qu'atender les necesidaes de la población refuxada.

Conceyos con ONG

El testu presentóse ayeri a les ONG y esta tarde va ser analizáu pol Conseyu Asturianu de Cooperación nun conceyu monográficu. A partir de mañana va abrise un procesu de participación dirixíu a representantes d'esti conseyu y de les organizaciones especializaes pa la so aprobación definitiva nes selmanes próximes.