El padre d'internet abre oficina n'Asturies

L'importantísimu Consorciu World Wide Web (W3Consortium) que dirixe Tim Berners-Lee, Premiu Príncipe d'Asturies d'Investigación 2002, va abrir n'Asturies la so 13ª oficina en tol mundu. La sé asturiana de la empresa del creador d'internet vien a sumase a les sés d'Australia, Países Baxos, Finlandia, Alemaña, Grecia, Hong-Kong, Hungría, Israel, Italia, Corea, Marruecos, Suecia y Reinu Xuníu/Irlanda. Tim Berners Lee ye ún de los padres de la rede internet, que creó xunta los investigadores Lawrence Roberts, Robert Kahn y Vintos Cerf.


La oficina va presentase esti llunes n'Uviéu nun actu en que van tar el mesmu Tim berners-Lee y el Presidente asturianu Álvarez Areces xunta representantes de la FiCYT y otros directivos de la W3C.

La W3C ye una entidá qu'axunta a representantes de toles grandes empreses informátiques (más de 400empreses y organizaciones) y qu'apurre recomendaciones y criterios qu'apauten estándares nel desarrollu tecnolóxicu de la rede. El consorciu remánenlu conxuntamente delles instituciones, ente les que rescamplen el Laboratoriu de Ciencies de la Computación y Intelixencia Artificial del Massachussets Institute of Technology, el Consorciu Européu pa la Investigación n'Informática y Matemátiques, y la Universidá nipona de Keio.

Cuando Berners-Lee vieno a recoyer el premiu Príncipe d'Asturies entamaron los contactos con elli, qu'agora, un añu depués, rematen cola llegada a Asturies d'una importante institución internacional.
Más de cien compañíes tan convidaes a la presentación del llunes.