El númberu 7 de 'Campo de los Patos' céntrase na vida y obra de Xuan Bello

La revista asturiana de cultura dirixida por Antón García dedica 182 de les sos 344 páxines al escritor de Paniceiros.

El dossier especial del númberu 7 de 'Campo de los Patos', qu'edita Saltadera, analiza dende distintos puntos de vista la vida y la obra de Xuan Bello. Asina, afonda nel so llau humanu, al traviés d'una entrevista de Vanessa Gutiérrez; nel narrativu, con artículos de Antonio Rivero Taravillo, Nathan Richardson y Gonzalo Martín de Marcos; poéticu, con trabayos de Martín López-Vega y Rodrigo Olay; y memorialísticu, con una aproximación de Jeroni Salom.

Lorea Agirre traza tamién un perfil mui personal de la so rellaición cola obra de Bello dende la perspeutiva d'una escritora vasca y García cuenta la historia del mapa lliterariu de Paniceiros que l'escritor ellabora nel 1991. L'especial inclúi amás una serie de narraciones inédites n'asturianu del propiu Bello.

Esti númberu de 'Campo de los Patos' complétase con prosa y poesía del siempre divertíu y agudu Luis Salas Riaño, residente en Noruega dende hai años, lo que-y permite captar el contraste ente aquella cultura nórdica y la de nueso; poemes occitanos n'edición billingüe d'Estève Salendres, Cecilia Chapduelh, Aubin Bonnet, Silvan Chabaud, Aurelià Lassaca y Maèla Dupon, toos ellos nacíos ente'l 1978 y 1988, que trai Javier Martinez Concheso; l'adelantu de la torna de Mara Mori de 'El cementeriu marín' de Valéry; un capítulu sobre la pintora Paola Consolo y l'arte del movimientu que se nomó Novecento, venceyáu a Mussolini, a cargu de la historia del arte Mercedes Menéndez; les páxines memorialístiques 'El cuadernu bemeyu', de Gonzalo G. Barreñada; y un repás al mundu del fútbol na lliteratura asturiana por Rafa R. Valdés fai un repás a la lliteratura asturiana. Por último, la seición 'Goleta de los Patos' inclúi reseñes sobre llibros, cine, esposiciones y televisión.

Presentación n'Uviéu

'Campo de los Patos' nació agora hai 7 años con un númberu doble dedicáu a la cultura xermánica y trátase d'una revista imprescindible pa saber cómo ta nesti momentu l'actualidá cultural d'Asturies vista dende la llingua asturiana. Nestos siete númberos dedicó especiales que van dende la poesía norteamericana o la xenerada pola Gran Guerra en Reinu Xuníu, Francia y Alemaña, incluyendo tamién obra creativa d'autores asturianos como Gutiérrez, Miguel Rojo, Montserrat Garnacho, Xosé Gago, Xulio Viejo y Rosario Neira, ente otros, amás de tornes, artículos y reseñes.

El númberu 7 va presentase esta tarde n'Uviéu a les 19 hores. L'actu va tener llugar nel Aula Escolanada del Edificiu Históricu de la Universidá d'Uviéu y va contar cola presencia de García y Bello, amás d'otros autores y collaboradores de la revista.