El númberu 42 de la revista ‘Asturies, memoria encesa d’un país’ ta en distribución

La Fundación Belenos yá tien a la venta’l númberu 42 de la revista ‘Asturies, memoria encesa d’un país’. Esti exemplar, que cuenta coles seiciones habituales y ocho artículos d’interés firmaos por investigadores de primer orde, vive un pequeñu aumentu de preciu –hasta los 20 euros en llibrería– por mor de la xuba del costu del papel.

Iván Huerga presenta ‘Celtes del Oeste, una revisión de la teoría atlántica’ y Alfonso Sánchez ‘El «catillus» decoráu del castru La Picona, Quirós. Un molín de mano astur con pareyos nes Islles Britániques’, mentes que David Guardado escribe sobre ‘La inscripción lombarda de Dublín y otres muestres de les conexones marítimes asturianes na dómina medieval’. ‘Llebres y otros animales gaiteros na iconografía asturiana’ ye’l testu qu’aporta Berto Peña, que xunto con José Antonio Pis tamién trabaya en ‘Enrique Novoa «Montaña», l’últimu balleneru (Ortigueira, Cuaña)’.

Tamién en comuña faen Paulino García y Xune Zapico l’artículu ‘Manuel Antonio Junquera Huergo, mayestru carpinteru horreru del s. XVIII’ y Rodrigo F. Joglar, Esteban G. Corteguera, Xosé Antón Fernández ‘Ambás’ y Ramsés Ilesies ‘La tradición del vigulín nel Conceyu Piloña’. Completa esta estaya de la revista Macrino Fernández con ‘Rosario de Acuña, una muyer exemplar que quixo vivir y morrer n’Asturies’.

La revista cuenta tamién coles seiciones fixes Entamu, Memoria Gráfica d’Asturies, Arcaz de Lletres Vieyes, Arcu Atlánticu, L’Estoxu y Cartafueyos de Belenos. Ésta yá ta en distribución nes llibreríes habituales a un preciu de 20 euros llueu d’un aumentu obligáu pol costu del papel.

La editora de ‘Asturies, memoria encesa d’un país’, la Fundación Belenos, qu’agradez el sofitu de la empresa Nordés Móvil p’asoleyar esti númberu, va principiar tamién col so unvíu a los 300 suscriptores a la mesma. El preciu pa veceros queda en 18 euros y la xente interesao n’abonase pue solicitar información nel corréu electrónicu fundacionbelenos@gmail.com.