El númberu 40 de la revista ‘Asturies’ recupera la estaya ‘Arcu Atlánticu’

Esta selmana van principiar los unvíos a suscriptores y la distribución nes llibreríes habituales del númberu 40 de la revista ‘Asturies. Memoria encesa d’un país’, que dedica una portada a una caparina por mor d’un artículu d’Ángel Morán. La Fundación Belenos va entamar una campaña p’aumentar el númberu de veceros.

La espublización cuenta coles estayes habituales como ‘Entamu’, ‘L’Estoxu’ y ‘Cartafueyos de Belenos’, y recupera ‘Arcu Atlánticu’, aniciada pol tristemente desapaecíu Aurelio Argel. Daniel Cueli espubliza nella l’artículu ‘El celtismu na dómina del post-folk: reflexones sobre la vixencia d’un elementu identitariu na música asturiana d’anguañu’.

Amás de ‘Caparines n’Asturies’, de Morán, la revista tamién inclúi los trabayos ‘Señores de forca y cuchiellu. La lleenda de ‘El Desterrado’’, de Berto Álvarez Peña; ‘‘Tres texos un reinado’. La eternidá nun dichu asturianu’, de Cristobo de Milio Carrín; ‘De la ḥiladera en Sotres, Cabrales’, d’Ana María Moradiellos), ‘Artes tradicionales de pesca en Llastres’, de Macario Victorero; y ‘La caxa sidra’, d’Inaciu Hevia Llavona. Como pieslle, inclúinse dellos testos n’alcordanza de Vitorino García, María de Trabáu, Celestina Ca Sanchu, José Feito y Pepe’l Ferreiro, persones bien relevantes que finaron a lo llargo d’esti 2020.

Dende la Fundación Belenos camiéntase poner en marcha, nes selmanes próximes, una campaña de suscripción a ‘Asturies. Memoria encensa d’un país’ pa potenciar esta revista histórica, fundamental na divulgación de la cultura tradicional asturiana.