El númberu 25 de la revista ‘Cultures’ preséntase en LibrOviedo

El mónográficu ‘La cultura asturiana, na encruciyada’ conforma’l númberu 25 de ‘Cultures. Revista asturiana de cultura’ que dirixe Roberto González-Quevedo y asoleya l’Academia de la Llingua Asturiana (ALLA). Analiza la encruciyada xeoeconómica de la cultura asturiana y va presentase nel marcu de la feria LibrOviedo.

Depués de dedicar l’anterior númberu a les ayalgues y les lleendes, nesta ocasión la exa monográfica del volume preséntase “como un analís coral, multidisciplinar dende les ciencies sociales, onde la reflexón antropolóxica encóntase en miraes téuniques y académiques proyeutaes dende la xeografía y la economía”. Cinco firmes participen nesti monográficu de ‘Cultures’, ente elles David M. Rivas, qu’abre la revista col artículu ‘Cambiu, crisis y recambiu: la sociedá rural asturiana, ente la traxedia y la esperanza’.

José Feito, entrevistáu por González-Quevedo, fala de ‘Sincretismu perversu ya síntesis adautativa eficiente: dous conceutos pa entender l’escenariu asturianu de desarrollu rural’, mentes que Xosé Nel Riesgo analiza una parte de la so trayeutoria profesional en ‘Acabación de la memoria del paisax asturianu’. Xosé Alba contribúi a esti númberu con ‘Área Metropolitana Central d’Asturies: la ciudadona que nos tien de poner nel mapa’, zarrando’l bloque monográficu’l propiu direutor de la revista ‘Los campesinos y el destín de la cultura asturiana: de la familia tradicional al futuru inseguru’.

Complétase’l conteníu con ‘Cuentos maraviyosos y d’encantamientos’, d’Alberto Álvarez Peña, y col homenaxe y estudiu que faen Xuan F. Bas y Yolanda Cerra de l’autora de la primer obra antropolóxica asturiana, Purificación Viyao Valdés.

Mañana en Trascorrales

El númberu 25 de ‘Cultures. Revista asturiana de cultura’ va presentase nel marcu del XVIII LibrOviedo, feria del llibru uvieína que se celebra na plaza de Trascorrales dende güei y hasta’l domingu n’horariu de 11 a 23 hores. L’actu va tener llugar mañana a les 13 hores cola presencia de González-Quevedo; el presidente de l'ALLA, Xosé Antón González Riaño; y dellos de los autores.