El nome oficial de les tres provincies del País Vascu, n’euskera

Bizkaia, Gipuzkoa y Araba-Álava. Éstos van ser los nomes oficiales de les tres provincies que formen la comunidá autónoma del País Vascu nun futuru próximu. Güei, el Congresu va tramitar una proposición del PNV nesi sen.
 
Na votación namái ta prevista la votación en contra de los diputaos del PP dao que'l cambiu de denominación d'estos territorios forma parte del acuerdu zarráu a últimos del 2010 ente socialistes y nacionalistes que, más allá del pactu presupuestariu y l'apoyu a les reformes económiques, incluyó temes relacionaos con otros ámbitos, como'l trespasu a Euskadi de les polítiques d'emplegu. La tramitación d'esta iniciativa de los nacionalistes vascos contará amás col sofitu del restu de los grupos nacionalistes y d’izquierda nel Congresu.
 
Esta posibilidá de camudar la denominación de les tres provincies del País Vascu debatióse delles vegaes nel Congresu, la última en xunetu. Naquella ocasión, el PSOE refugó la posibilidá de sustituyir los topónimos en castellanu polos vascos. Agora, tres el pautu col PNV, la situación cambia dafechu. Nun sería una novedá, puesto que dos provincies catalanes (Girona y Lleida) y la comunidá autónoma balear (Illes Balears) yá vieron modificada la so denominación castellana y mantienen namái la propia del llugar.
 
El trámite de güei nel Congresu va servir pa tomar en consideración la iniciativa. El siguiente pasu va ser la posibilidá de presentar enmiendes a la proposición enantes de la so tramitación parlamentaria.