“El Nobel a Dylan ye una decisión desconcertante y pémeque desafortunada”, afirma Xandru Fernández

L’alderique sobre’l Nobel de Lliteratura d’esti añu sigue tando activu tanto en tertulies como en redes sociales. La Svenska Akademien concediólu al cantautor Bob Dylan, lo que llevantó crítiques en dellos sectores. L’escritor Xandru Fernández considéralo “una decisión desconcertante y pémeque desafortunada”.

“Discusiones que lleven años, matizaciones (qué ye la lliteratura, qué nun lo ye), acaba solventales un puñáu d'académicos manu militari. El procedimientu ye una chapuza intelectual, independientemente del xuiciu que nos mereza'l premiáu”, esplica l’autor nacíu en Turón.

Entrugáu sobre si pue considerase poesía les lletres de Dylan, apunta que “nun me parez demasiao discutible que lo que fai sía poesía”, anque puntualiza que “lo que toca preguntase ye, de mano, si ye lliteratura. Y de siguío, si fuera evidente que lo ye (y yo creo que nun ye evidente n'absoluto), había que preguntase si la obra lliteraria de Dylan resiste en comparanza cola d'otros ganadores plausibles”.

Lo cierto ye que con esta decisión l’Academia Sueca consiguió una repercusión mediática importante y abrió una polémica más habitual del Nobel de la Paz que de les otres disciplines. “El Nobel de Lliteratura, anque sía difícil aplaudir siempre'l criteriu del xuráu, conservaba hasta agora una respetabilidá que'l de la Paz yá perdió cuantayá. Con esta ocurrencia acaba de colocase al mesmu nivel. Nun ye una traxedia, pero yera innecesario”, entiende Fernández.