El Náxara, rival del UP Langreo na segunda ronda pol ascensu a Segunda Divisón B

|
Náxara-UP Langreo

L'equipu rioxanu, terceru del so grupu, vien d'eliminar a L'Hospitalet. L'Elche-Sporting B va xugase'l domingu a les 19 hores.

El sortéu celebráu na tarde d'ayeri na Ciudad del Fútbol de Las Rozas crució al UP Langreo col Náxara nel so camín hacia la Segunda División B. El conxuntu rioxanu vien d'eliminar al potente L'Hospitalet tres sentenciar en casa por 3-0 una eliminatoria que comenzó con un empate ensin goles en Catalunya.

Habitual nos años últimos nes eliminatories d'ascensu, el Náxara nunca foi quien a dar el saltu de categoría. El partíu d'ida va xugase'l sábadu, a les 18 hores, en La Salera, un campu más bien pequeñu de prau natural en mui bon estáu y onde l'afición llocal aprieta.

Ensin sortéu

El Sporting B, que yá conocía dende'l domingu'l so rival na segunda eliminatoria d'ascensu a Segunda División A polos condicionantes especiales del sortéu qu'impiden enfrentase nesta ronda a equipos del mesmu grupu, va xugar el domingu a les 19 hores nel Martínez Valero (LaLiga 1|2|3 TV) el partíu d'ida col Elche. Entrenáu por l'ex téunicu del Uviéu Pacheta, los d'Elx finalizaron terceros del so grupu con trés puntos más que'l Cornellà, conxuntu al que dexó fuera'l filial roxiblancu con superioridá.

L'oxetivu únicu del Elche, club que tuvo 21 temporaes en Primera Divisón, la última na 2014-2015, onde sufrió un descensu alministrativu, ye recuperar la categoría que perdió la campaña pasada. Na so plantiya caltién a un xugador del so pasu per Primera, el capitán Edu Albacar –lesionáu–, y futbolistes con una trayeutoria amplia nel fútbol profesional como Benja o'l goliador Nino, un delanteru que siempre sonó pa reforciar al Sporting.

Na primer ronda, los ilicitanos eliminaron al Murcia tres ganar en La Condomina por 0-1 y nel Martínez Valero por 3-2 nun partíu que los de Pacheta controlaron en too momentu.

Contador Estadistiques