El naviego Alberto Castro Gión gana’l XXI Premio Xeira de Narracióis Curtias en Gallego-asturiano

Alberto Castro Gión (Navia, 1983) llevóse’l XXI Premio Xeira de Narracióis Curtias cola so primera incursión na narrativa en gallego-asturiano. ‘Inverno’ ye’l nome de la obra que convenció al xuráu del gallardón.

Profesor de gallego-asturiano nes escueles Ramón de Campoamor de Navia, CRA Tapia-Castripol y Valdepares, Castro consiguió asina llevase’l primer premiu del concursu lliterariu, el más veteranu de los que se faen na llingua del occidente del país, con una recompensa de 600 euros. El Premio Xeira nació nel añu 1991 col oxetivu de revitalizar una llingua con munchu usu oral, pero con una ausencia importante d’obres escrites. Agora, 21 años depués, l’Asociación Cultural Xeira ve los frutos del so trabayu con una resudirmientu de la creación lliteraria na fastera.  
 
Otra manera, el xuráu d’esta edición del Premio formáu polos escritores Manuel García Galano, María José Fraga Suárez, José Manuel Martínez Castro y Rafael Cascudo Noceda, decidió dar una mención especial a otros dos rellatos participantes nel concursu: ‘A cama coxa’, de Laura Fernández Alonso, y ‘Pensando en ti na Paicega’, de María Teresa Pasarín Arne.