'El nataliegu', ficha didáutica nueva en 'A la Gueta los Suaños' pa celebrar la Navidá

Les neñes y neños d'Asturies esperen la llegada de L'Anguleru esta Nuechebona, que pide recuperar esta tradición y el ramu nadal.

Munches cases d'Asturies amburen esta nueche el nataliegu, un ritual que taba cercanu a desaniciase pero que poco a poco dalgunes families traten de recuperar. 'A la Gueta los Suaños', na so estaya de fiches didáutiques pa rapacinos y rapacines, incorpora una nueva dedicada al tueru de navidá nel qu'esplica esta tradición y el so contestu.

Amás, la xente interesao n'afondar más sobre estes fiestes, el so orixe y les so tradiciones pueden consultar el nuesu espaciu d'Asturies.com ‘Ye tiempu de… Navidá’. En 'A la Gueta los Suaños' tamién ta disponible un reportaxe sobre la Navidá.

Esta tarde, llegada a L'Arena

A les 18.30 hores ta prevista la llegada dende'l mar de los Sargazos a L'Arena de L'Anguleru, personaxe navidiegu que reparte regalos ente les neñes y neños asturianos. Darréu va comenzar cola pesca de l'angula que venderá pa poder mercar los presentes a los que foran bonos a lo llargu del añu y pongan un gorru de llana y dalgo pa comer y beber pa reponer fuercies baxo l'árbol de Navidá.

L'Anguleru afala nel so mensaxe d'esti añu a recuperar tradiciones como'l nataliegu y ramu nadal, recuerda la necesidá de cuidar la naturaleza y los nuesos ríos, y anima a dar munchos abrazos pa ser feliz y facer feliz a los demás.